Diario Vasco

Txillardegi ekologista eta animaliazalea gogoratuko dute

  • Txillardegi Liburutegia herri ekimenak eta Eguzki talde ekologistak hitzaldia antolatu dute ostiral honetarako Donostiako Liburutegiko ekitaldi-aretoan

Txillardegi hil zeneko 5. urteurrena dela eta burutzen ari diren jardueren artean, Txillardegi Liburutegia herri ekimenak eta Eguzkik 'Txillardegi, ekologista eta animaliazalea' izenburuko hitzaldia antolatu dute. Ostiral honetan egingo da, otsailaren 10ean, 18:30ean, sarrera San Jeronimo kaletik duen Donostiako Liburutegiko ekitaldi-aretoan. Markos Zapiain eta Martin Anso izango dira hizlariak.

Idazle gisa saiakeraren arloan nabarmendu den Markos Zapianek azalduko du nolako ideia filosofikoetan nahiz pasarte biografikoetan sustraituta dagoen Txillardegik liburu askotan erakutsi zuen animaliekiko begirune edo elkartasuna. Hitzaldiaren gaiari dagokionez, 'Txillardegi eta ziminoa argitaratu' zuen 2007an.

Eguzki taldeko kide Martin Ansok, berriz, Txillardegik Donostiako ekologistekin eta animaliazaleekin izan zuen harremanari buruzko zertzelada batzuk emango ditu. Antolatzaileek adierazi dutenez, «Txillardegi pertsona polifazetikoa zen, baina ekologista eta animaliazalearena ez da, ezta hurrik eman ere, haren fazetarik ezagunena. Hortaz, bakarren batentzat aurkikuntza interesgarria izango da, seguru».

Markos Zapianek nabarmendu duenez, Txillardegik bere lehen ipuinean bertan, 1957ko 'Orangutanen uhartea' izenburukoan, azaldu zuen lehen aldiz ondoren haren idatzietan behin baino gehiagotan islatu zuen kezka bat: gizakia zein puntutaraino bereizten den ziminoengandik eta, oro har, gainerako animaliengandik. Kezka haren ondorioz, «bere liburuetan beti erakutsi zuen sufritzen ari ziren animaliekiko erruki nabarmena».

Hori dela eta, Txillardegi Liburutegia herri ekimenak eta Eguzkik 'Orangutanen uhartearen' berrargitalpen bat egin dute, ipuin hura lehen aldiz publikatu zela 60 urte betetzen diren honetan. Hitzaldian banatuko dute. Pdf-a, berriz, lotura honetatik deskargatu daiteke.

Temas

Recibe nuestras newsletters en tu email

Apúntate