Diario Vasco

Mintzalaguna ekimenean izena emateko epea ostiralean amaituko da

Euskarazko solasa errazteko beste ekimen batzuk ere badaude. Adibidez, Mintzodromoa,
Euskarazko solasa errazteko beste ekimen batzuk ere badaude. Adibidez, Mintzodromoa, / LUSA
  • Mintzapraktika behar dutenek 25 euro ordaindu beharko dute eta Bageraren web gunean edo egoitzan eman behar dute izena

Donostiako Udaleko Euskara Zerbitzuak eta Bagera elkarteak Mintzalaguna egitasmoa abiarazi dute, eta izena emateko epea ostiralean bukatuko da, urriaren 21ean. Mintzapraktika behar dutenek 25 euro ordaindu beharko dute, duela bi ikasturte baino 50 euro gutxiago.

Donostiako Udaleko arduradunen esanetan, «programak arrakasta handia izan zuen iaz eta, hori dela eta, Mintzalaguna indartzen jarraitu nahi dugu. Horretarako, kuota bere horretan mantenduko dugu, egitasmoan jende gehiago parte hartzeko».

«Egitasmo hau euskaraz aritzeko ohitura, trebetasuna eta erraztasuna lortu nahi duten euskara ikasleei zuzenduta dago, eta berebiziko garrantzia du ezagutzatik erabilerarako jauzia emateko» gogorarazi dute.

Ikasturte honetan praktikatu nahi dutenen erantzuna antzekoa eta handiago izatea espero da eta, ondorioz, antolatzaileek dei berezia egin dute euskaraz hitz egiteko ohitura duten lagunei ikasle hauei laguntza eskainiz parte hartzeko. Nahikoa da astean ordu bat eskaintzea, eta ikasleek euskaren erabileran aurrera egiten lagunduko lukete. Euskal Herriko Unibertsitatearekin (EHU) egindako hitzarmenari esker, programan laguntzaile moduan aritzen diren ikasleek kredituak lortzeko aukera izango dute.

Esan bezala, Mintzalagun egitasmoan izena emateko epea ostiralean amaituko da. Izena emateko bide nagusia Bagera elkartearen www.bagera.eus webgunea da. Horrez gain, elkartearen egoitzan (Hernani kaleko 15 zenbakian) edo 943 00 50 74 telefono zenbakian ere egin daiteke.

Mintzalaguna egitasmoan, euskaraz hitz egiteko ohitura duten lagunak hitz egiteko ohitura eta aukerarik ez dutenekin elkartzen dira, astean behin gutxienez, norberaren ordutegira egokituta. Hiru edo lau laguneko taldeak izaten dira normalean. Horrez gain, hilean behin, taldeko jarduerak antolatzen dira mintzalagun guztientzat (orteerak, bisita gidatuak eta abar).

Azken urteotan 200 bat lagun aritu dira urtero Mintzalaguna egitasmoan. 2015-2016 ikasturtean 350 lagun aritu ziren 86 taldetan, astero euskaraz hitz eginez Donostiako kaleetan. Horietatik, praktikatu nahi zutenak 250 izan ziren; 2014/2015 ikasturtean adibidez, 132 izan ziren.

Mintzalaguna egitasmoa duela 23 urte sortu zuen Bagera elkarteak, eta geroztik, Donostian, pertsona asko aritu da euskaraz berriketan asteroko hitzorduetan hiriko kaleetan. Donostian ez ezik, Euskal Herriko 65 herri eta hirietan ere zabaldu da egitasmoa; azken ikasturtean, esaterako, 6.000 mintzalagun aritu dira Euskal Herri osoa.

Temas

Recibe nuestras newsletters en tu email

Apúntate