Diario Vasco

Liburutegi publiko nagusiek elkarrekin prestatu dute euren eguna

Jardunaldiak astelehen goiz honetan aurkeztu dituzte.
Jardunaldiak astelehen goiz honetan aurkeztu dituzte.
  • Hilaren 24an ospatuko den Liburutegiaren Eguna dela eta egitarau zabala prestatu dute Koldo Mitxelenak, Donostia Kulturak, Tabakalerak eta Donostia 2016 Fundazioak

Urriaren 24an Liburutegiaren Eguna ospatzen dela eta, Donostia Kulturak, Koldo Mitxelena Kulturuneak eta Tabakalerak elkarlanean, Donostia 2016 Fundazioaren lankidetzarekin bi eguneko jardunaldiak antolatu dituzte. 'Liburutegiak ezagutza sortzen eta partekatzen' lemapean, profesionalei eta publiko zabalari zuzendutako egitarauan hainbat gai landuko dira.

Urriaren 22an, larunbata, eta 24an, astelehena, gauzatuko dira prestatu dituzten jarduerak. Urriaren 22ko saioa Koldo Mitxelena Kulturuneko Liburutegian egingo da, 10:30etik 13:30era. Bertan Donostiapediako editoreen lantegi irekia egingo da euskaraz.

Urriaren 24an, berriz, hitzaldiak eta mahai inguruak izango dira Alde Zaharreko Udal Liburutegi Nagusian, 9:30ean hasita. Aurreneko saioa, ordutebetekoa, Tomás Saorínek eskainiko du, eta 'Continente GLAM-Wiki, el viaje a Wikipedia de las instituciones culturales y educativas' gaia landuko du. Ondoren, orduerdiko hainbat saio eskainiko dira segidan: '200 bibliowikis en Catalunya: planes de futuro' (Carme Fenoll); 'Wikipedia en las bibliotecas: Biblioteca Reina Sofía de Valladolid y red de bibliotecas del Principado de Asturias' (Ruben Ojeda); 'Wikipedia, DBpedia y Wikidata' (Francisca Hernández). 12:00etatik 12:30erako atsedenaren ondotik, mahai ingurua helduko da, Jon Bagües, Eresbil musika artxiboko zuzendaria gidari dela. Goizeko saioan parte hartu duten hizlariak bilduko dira gaztelaniaz egingo den mahaiaren inguruan.

Bigarren mahai inguru bat ere egingo da astelehenean, arratsaldeko 18:00etatik 20:00etara. 'Gertuko begiradak' izango du izenburua eta euskaraz egingo da. Moderatzaile Xabier Cañas, wikilaria eta Donostia Kulturako teknikaria, dutela, Elena Oregi (Donostiako Haur liburutegia); Aitzol Astigarraga (Donostiapedia); Joseba Agirreazkuenaga eta Mari Jose Villa (Bilbaopedia); Arantza Mariskal (Tabakalera) eta Josu Aranbarri (Wikimedia Commons) ariko dira.

Antolatzaileek jakinarazi dute jarleku kopurua mugatua denez izena aurretik ematea komeni dela, liburutegiaalderdieder@donostia.eus helbidera mezua bidalita.

Temas

Recibe nuestras newsletters en tu email

Apúntate