Diario Vasco

Mintzapraktika 25 euroren truke

Udaleko eta Bagerako ordezkariak astelehen goiz honetan egindako aurkezpenean.
Udaleko eta Bagerako ordezkariak astelehen goiz honetan egindako aurkezpenean.
  • Mintzalaguna egitasmoan izena emateko epea urriaren 21era arte dago zabalik. Aurreko ikasturtean 350 parte-hartzaile izan zituen ekimenak Donostian

Bigarren ikasturtez, Mintzalaguna egitasmoa sustatu eta indartzeko urratsak emango dira 2016-2017 ikasturtean Donostiako Udaleko Euskara Zerbitzuak eta Bagera elkarteak lortutako akordioari esker. Gauzak horrela, mintzapraktika behar dutenek 25 euro ordaindu beharko dute, lehen baino 50 euro gutxiago. Ordaindu beharrekoa nabarmen merkatu denez, egitasmoan mintzalagun gehiagok parte hartu zuen aurreko ikasturtean ikasleen kopurua bikoiztuz, guztira 350 parte-hartzaile izan zituen 2015/2016 ikasturtean.

Miren Azkarate Euskara zinegotziaren esanetan, «programak arrakasta handia izan zuen iaz eta, hori dela-eta, Mintzalaguna indartzen jarraitu nahi dugu. Horretarako, kuota bere horretan mantenduko dugu. Eta helburua segidakoa da: egitasmoan jende gehiagok parte hartzea».

«Egitasmo hau euskaraz aritzeko ohitura, trebetasuna eta erraztasuna lortu nahi duten euskara ikasleei zuzenduta dago eta berebiziko garrantzia du ezagutzatik erabilerarako jauzia emateko» gogorarazi du Azkaratek.

Ikasturte honetan ere praktikatu nahi dutenen erantzuna antzekoa eta handiago izatea espero da eta, ondorioz, antolatzaileek dei berezia egin nahi izan dute euskaraz hitz egiteko ohitura duten lagunei ikasle hauei laguntza eskainiz parte hartzeko. Nahikoa da astean ordu bete eskaintzea, eta ikasleek euskaren erabileran aurrera egiten lagunduko lukete.

Euskal Herriko Unibertsitatearekin egindako hitzarmenari esker, programan laguntzaile moduan aritzen diren EHUko ikasleek kredituak lortzeko aukera izango dute.

Izena emateko epea zabalik

Mintzalagun egitasmoan izena emateko epea zabalik da eta urriaren 21ean amaituko da, beraz, euskara praktikatu nahi dutenek eta praktika horretan lagundu nahi duten euskaldunek izena emateko aukera dute gaurtik aurrera. Izena emateko bide nagusia Bagera elkartearen webgunea izango da. Horrez gain, elkartearen egoitzan (Hernani kaleko 15. zenbakian) edo 943005074 telefono zenbakian ere egin daiteke.

Mintzalaguna egitasmoan euskaraz hitz egiteko ohitura duten lagunak, hitz egiteko ohitura eta aukera ez dutenekin elkartzen dira, astean behin gutxienez, norberaren ordutegira egokituta. Hiru edo lau laguneko taldeak izaten dira normalean. Horrez gain, hilean behin, taldeko jarduerak antolatzen dira mintzalagun guztientzat (irteerak, bisita gidatuak eta abar).

Azken urteotan, 200 bat lagun aritu dira urtero Mintzalaguna egitasmoan. 2015-2016 ikasturtean, 350 lagun aritu ziren 86 taldetan, astero astero euskaraz Donostiako kaleetan. Horietatik, praktikatu nahi zutenak 250 izan ziren, 2014/2015 ikasturtean adibidez, 132 ziren.

Mintzalaguna egitasmoa duela 23 urte sortu zuen Bagera elkarteak, eta geroztik, Donostian, pertsona asko aritu da euskaraz berriketan asteroko hitzorduetan Donostiako kaleetan. Eta Donostian ez ezik, Euskal Herriko 65 herri eta hirietan ere zabaldu da egitasmoa, azken ikasturtean esaterako 6.000 mintzalagun aritu dira Euskal Herri osoan.

Miren Azkarate zinegotziak gogora ekarri du euskararen erabilera sustatzeko egitasmo ugari sortu dela Donostian, «mintzalagunaz gain, mintzodromoak eta mintzanet Gipuzkoako hiriburuan sorturiko proiektuak izan dira».

Recibe nuestras newsletters en tu email

Apúntate