Diario Vasco

Metroaren aurkako protesta Kontxan

Metroaren aurkako protesta Kontxan
  • Pankarta baten bidez eta esku-orriak banatuz, azpegitura horren beharrik ikusten ez dutenek kontra egoteko dituzten arrazoiak zabaldu dituzte

Kontxako estropaden lehen eguna baliatu dute hamarnaka lagunek Donostian egin nahi duten metroaren aurkako protesta burutu eta proiektua bertan behera gera dadin eskatzeko. Hondartzaren erdian 'Metroa Kontxaren azpian? Erokeria!' zioen pankarta jartzeaz gai, kate bat egin dute eta esku-orri informatiboak banatu dituzte paseoan.

Gogorarazi dute dute Donostian metro bat eraikitzeko egitasmoa -hau da, hiriaren erdialdea eta Kontxako hondartza zulatuko lituzkeen 'pasantea' delakoa- «irailaren 25eko hauteskundeetatik aterako den Eukal Gobernu berriak» hartuko dituen erabakien baitan dagoena, eta esku-orrian bildu dituzte «metroaren Pasantearen aurka egoteko arrazoiak». Besteak beste, diote, «Eusko Jaurlaritzaren azterketa baten arabera, metroaren pasanteak autobus zerbitzuei kenduko lizkieke bidaiariak nagusiki (batipat Dbus eta Lurraldebusi, zeinek bidaiarien %15 galduko luketen), eta oso gutxi ordea ibilgailu pribatuaren erabiltzaileen multzoari (metroak autoen trafikoaren %1’5 bereganatuko luke bakarrik, praktikan hutsaren hurrengoa bezala dena). Hori gutxi balitz, azterketa horrek Dbus-en zenbait autobus linea kentzea planteatzen du gero (5/Bentaberri, 24/Altza-Gros), baita beste zenbait linearen maiztasuna murriztea ere (13/Altza, 28/Amara-Ospitaleak…). Ondorioz, garraio publikoa erabiltzen duten pertsonei txarrerako eragingo lieke».

Horrez gain, azpimarratu dute «metro-pasantearen obrak gutxienez 200 milioi euroko kostua luke, eta lanek eragin handia izango lukete Amaran, Erdialdean eta Antiguan. Obrak kostaldeari ere eragingo lioke, Metroa Kontxako hondartzaren azpian sartzen baita 300 metroko tarte batean: Perla-tik Hotel Londres-eraino hedatzen den hondartzaren eremua alderik alde zeharkatuko luke, 34 metroko sakoneran. Azpiegituraren metro bakoitzaren gastua 50.000 eurotik gorakoa litzateke, behar gabeko eta inposatutako obra batean diru publikoa xahutuaz, gizartearentzat urjentziazkoak eta beharrezkoak diren jardueren kaltetan».

Temas