ALEGIA DV. Asteazken gauetan, afaldu osteko kafetxoa hartu eta berehala igotzen da jendea gaztetxera, butakarik erosoena eta lekurik hoberena lortu asmoz, neguan gauza ederra baita salamandraren alboan jarri eta filme eder batekin gozatzea.
Hiru Oscar sari
Datorren asteazkenean, azkenaldian oso entzutetsu bilakatu den El laberinto del fauno filma izango da ikusgai. Hiru Oscar sari irabazi dituen Guillermo del Tororen filme honek 1944. urtera garamatza. Ofelia, 13 urte neskatoa, bere amarekin herri txiki batera joango da, eta bertan, fauno batekin, bizidun arraro batekin topo egingo du. Honek neskatoari esango dio printzesa bat dela, eta bere benetako erreinura itzuli nahi badu, hiru froga gainditu beharko dituela ilargi betearen aurretik.
Filme honetan, errealitatearen eta fantasiaren artean jauzika ibiliko gara etengabe, abentura eta emozio askoren artean.
