Txondorra piztuko dute larunbatean Lizarrustin

Ikazkina, txondorra elikatzen./
Ikazkina, txondorra elikatzen.

Abenduaren 23a arte egongo da piztuta, Aralarren bere garaian garrantzi handia izan zuen ikazkintza gogoratzeko eta ikazkinen lana omentzeko

Aspaldi honetan desagertuta den ikazkinaren lanbideari omenaldia egiteko, txondorra piztuko dute datorren larunbatean, abenduak 2, Aralar Parke Naturalean kokatutako Lizarrustiko parketxean, Ataunen. Gipuzkoako Foru Aldundiak, Ataungo Udalak eta Gipuzkoako Parketxe Sareak antolatutako ekimen honen bidez Aralarren ikazkintza eta basogintza historian zehar nolakoa izan den ezagutzeko aukera izango du bisitariak, prestaturiko jardueren bidez.

Zenbait egunez luzatuko den egitarauaren berri emateko zabaldu duten oharrean dioetenez, "egurretik ikatza ateratzearen lanbidea da ikazkintza, duela urte asko sortua. Bizibide honek garrantzi handia izan zuen Euskal Herrian, burdinolak sortu eta garatu ahala, baita beranduago ere, guda garaian etxe zein garraiobide berrietan erabiltzen hasi zirenean. Berrogeita hamargarren mendean ordea, egur-ikatzaren kontsumoa asko murriztu zen, beste erregai eta energia-iturriak sartu zirenean, harik eta hirurogeigarren hamarkadan lanbide hau guztiz desagertu zen arte".

Aralarko parketxearen lanbide zahar honi omenaldia egingo diote eta berriro ere gizarteratuko dute, "modu ludikoan bederen". Txondorra larunbat eguerdiko 12:00etan piztuko da. Ataungo eskolako ikasleek girotuko dute unea eta, gainera, kablearen bidezko egurraren garraioaren erakustaldia egingo da eta txondorraren eraikitze prozesuaren inguruko argazki erakusketa ere egongo da parketxean. Haurrentzako jolasak eta txokolate beroa ere eskainiko da.

Abenduaren 23an itzaliko da txondorra, Jentilen eta Olentzeroren ibilaldiarekin batera. Bigartean piztuta egongo da, ikusgai, nahi duenarentzat. Taldeekin bisita eta tailer bereziak ere egingo dira, ordua aurrez erreserbatuta betiere. Informazio gehiagorako telefono zenbaki hauek daude bisitarien eskura: 943 18 03 35 / 688 89 50 69, hala nola helbide elektronikoa barandiaran@gipuzkoamendizmendi.net.

Temas

Euskera

Contenido Patrocinado

Fotos

Vídeos