Diario Vasco

Zuberoako ahots eta herri-musikak igandean Donostian

Ikuskizunaren aurkezpeneko argazkia.
Ikuskizunaren aurkezpeneko argazkia. / USOZ
  • Bedaxagar, Etxekopar, Beltran, ardiak, txoriak... hori dena batera Kursaaleko Ganbara Aretoan eskainiko den 'Zuhainpeko soinuak' ikuskizunean

'Zuhainpeko soinuak-Ahozko transmisioa' ikuskizuna eskainiko dute igande honetan Donostian, Kursaaleko Ganbara Aretoan, 19:00etatik aurrera. Zuberoako ahots eta herri-musikak ditu ardatz, Iparraldeko bost musikari eta Hegoaldeko lau elkartu dira ekimen honetan. Antzerkitik ere izango du, eta eszenografiaz Mireia Gabilondo eta Fernando Bernués arduratu dira.

Syntorama diskoetxeak jarri zuen abian 'Zuhainpeko soinuak'. Akitania-Euskadi-Nafarroa Euroeskualdea, Gipuzkoako Foru Aldundia, Eusko_jaurlaritza eta Maule-Lextarreko Udala izan ditu laguntzaile. Mireia Gabilondoren zuzendaritzaren pean, Zuberoako musiken adierazgarri nagusia den Jean Mixel Bedaxagar ikusiko da agertokian, euskal herri-musikaren erreferenteetako bat den Juan Mari Beltranekin batera. Batak kantatu egingo du eta txirula eta ttun ttuna joko; bestea txalaparta, alboka, oboe eta perkusioaz arduratuko da. Haien ondoan, aire zaharrak eskainiz nahiz melodia berriak sortuz, Mixel Etxekopar, Mathieu Mendizabal, Sacha Standen, Pierre Vissler, Ander Barrenetxea eta Aitor Beltran arituko dira, beti ere beren sustrai tradizionalenetan oinarrituz.

Hiru ahots entzungo dira. Bedaxagar eta Etxekopar ipartarrekin batera Maider Ansa aranoarra ariko da. Irudiak ere garrantzitsuak izango dira ikuskizunean zehar. Naiel Ibarrolak –Agustinen biloba, Joseren semea– kutsu oniriko xamarra duten marrazkiak sortu ditu.

Guztira hemezortzi abesti entzungo dira, beti nolabaiteko 'nahasketa' izango dutenak. Adibidez, batera ariko dira Ansa eta Bedaxagar, eta Iparraldeko doinu zahar batzuei txalaparta gehituko zaie.

Bestalde, Etxekoparrek egindako grabazio batzuk ere entzungo dira. «Berrehun ardiren soinua ekarriko dut. Zuberoan ere badugu gure orkestra handia», esan zuen atzoko aurkezpenean. Halaber, txori-hotsek ere izango dute tarterik.

Bedaxagarrek gaineratu zuen «bihotz altxagarri» dela ikustea badatozela musikari gazte berriak. Juan Mari Beltran honela mintzatu zen: «Agurainen aurre-estreinaldia egin genuenean harrapatuta sentitu nintzen zuberotar hauei begira!».

Temas

Recibe nuestras newsletters en tu email

Apúntate