Marjinazioaren ugaria

Marjinazioa eta auto-marjinazioa senideak dira. Edo bata besteearen ondoria

RUFINO IRAOLA

Aho fineko ezpata da marjinazioa. Normalean, marjinatzen duenak disimuluan mugitzen ditu tentakuluak. Badira marjinazio-molde txit baldarrak eta lotsagabeki apailatzen direnak. Adibidez, norbait bere koloregatik baztertzea.

Gaur txikiez mintzatuko gara, zolitasun handiko marjinazioez. Baina, marjinazio zolia, aise antzematen dena bezain mingarria da, zirrikitu txikienean ere sartu egiten baita.

Bestalde, marjinazioa eta auto-marjinazioa senideak dira. Edo bata bestearen ondorioa. Norbaitek bultza egiten digunean, guk, normalean, atzera egiteko joera dugu: horra, bada, auto-marjinazioa.

Ikasi dut, prentsaurreko batetik kanpora uzten banaute, ez protestatzen, erantzuna aurrez prestatua daukate eta: «notizia nahi bahuen, heu joan behar huen bila», esango dizute, besteak abisatu gabe joan izan balira bezala.

Bada jendea ezikusiarena disimulu ederrean egiten duena. Segituan ohartzen zara han ez duzula ezer pintatzen, baina aguantatu (duintasunari eutsi) egin behar, ridikulu handiagoa ez egitearren.

Lehiaketa bati, segun eta zeienek irabazten duen, egundoko bonboa ematen zaio; beste zenbaitek irabazten badu, ordea, juxtu-juxtu aipatu besterik ez. Lasterketa-antolatzaile guztiek Froomek irabaztea nahi dute, horrek karrerari prestigioa ematen diola uste-eta. Batere disimuluri gabe hedatuko dute lau aldetara: «Guretzat ohore handia da Froomek irabaztea». Karrera hori bera, hurrengo urtean, teorian apalagoa den batek irabazten badu, antolatzaileek ez dute esango txintik ere: hori ere marjinazioa da.

Neska-mutilen koadrilan, beti izaten da ‘tontoren bat’, mendira joandakoan-eta, hamaika patata-tortilla egin eta ontzi ugari garbitu beharko dituena, esker handirik gabe. Horri ere marjinazioa esaten diot nik.

Bilerak dira askotan marjinaziorik finenak eta zolienak ikusten diren tokia. Adibidez, hiru lagun elkartzen dira bilera batean. Demagun bi mutil eta neska bat direla; bi mutilak elkarrekin hika mintzatzen dira, neskarekin biak zuka eta neskak ere zuka egiten die mutilei. A eta B dira mutilak. Nahiz eta B-k ipini argudioa mahai gainean, A-k, beti, zuka eta neskari, erantzuten dio. Hori marjinazioa ez bada...!

Hilaren 17an, bertsoen ostean, Kataluniako hauteskundeei buruzko debatea entzuten egon nintzen. Esate baterako, nahiz eta CUPekoak PPkoari egundokoak esan, inoiz ez zion erantzun PPkoak CUPekoari. Hori ere marjinazio mota bat da.

Arbola eroria ezpaltzeko ohitura handiegia dago hemen.

Contenido Patrocinado

Fotos

Vídeos