Zabalik da Atlantikaldia jaialdirako proposamenak bidaltzeko epea

Iazko edizioko argazki bat. /ARIZMENDI
Iazko edizioko argazki bat. / ARIZMENDI

Datorren irailean Errenterian 'Itsas Korronteak' lemapean egingo den ekimenean partu hartu nahi izanez gero, astelehen honetatik maiatzaren 11ra arte bidali ahal izango dituzte proposamenak herritar zein eragileek

Atlantika jaialdiaren 2018ko edizioa irailaren 20tik 23ra egingo da Errenterian, baina iritsi da gauzak prestatzen hasteko garaia: astelehen honetan, apirilak 9, proposamenak bidaltzeko epea zabaldu da, eta zabalik jarraituko du maiatzaren 11ra arte.

Antolatzaileek jakinarazi dutenez, «sorkuntza artistiko ezberdinak ardatz dituzten ekimenak eta itsasoarekin zerikusia duten proposamenen bila ari da antolakuntza batzordea». Hain zuzen ere, «eragileen proposamenek elikatzen dute Atlantikaldia jaialdiaren programazioa. Errenteriarrek ematen diote nortasuna jaialdiari, eta euren parte-hartzea sustatu nahian, aurreko edizioetan bezala, Udalak herritarren proposamenekin osatu eta aberastu nahi du jaialdia».

Proposamenak baloratzeko garaian, antolakuntza batzordeak honako irizpide hauek izango ditu kontuan: «urtean zehar antolatutako ohiko ekitaldien errepikapena ez izatea, hots, berrikuntza bat barneratzea; parte-hartzea sustatzea, eragile ezberdinenarteko elkarlanetik sortutako ekimena izatea; itsasoa ardatz hartuta sortutako ekimena izatea eta kaletarra, topagune izatea».

Proposamenak aurkezteko epea 2018ko apirilaren 9tik maiatzaren 11ra arte egongo da zabalik, bi egun horiek barne. Dokumentazioa online aurkeztu behar da, webgunean dagoen eskaera-formularioaren bitartez. Behin Atlantikaldiak proposamenen balorazioa egin eta gero, maiatzaren 9tik ekainaren 9ra bitartean igorlearekin jarriko daharremanetan antolakuntza batzordea.

Itsas korronteak

Jaialdiaren antolatzaileek adierazi dutenez, «garai bateko marinelen antzera, itsasoa ulertu eta bere baitan duen indarraz baliatuta egin beharko genuke aurrera, elementuei bizkarra eman beharrean, elkarren artean lagunduz. Itsas korronteak izan ziren munduarekin konektatu gintuztenak eta munduarekin dugun loturak inoiz baino handiagoa dirudienean, konexio hau inoiz baino azalekoagoa da. Atlantikaldiak bere ekarpena egin nahi du zentzu honetan, herri ezberdinetako pertsonen, kulturen eta ohituren arteko harremana sendotuz».

Hortik sortu dute aurtengo lelo izango den 'Itsas Korronteak' kontzeptua: «Itsas korronteek izaera ezberdinak dituzte, aldakorrak dira, norabide asko dituzte, eraldaketan eta eraldatzen dihardute, elkartu eta banatu egiten dira, gurutzatu egiten dira, mugarik ez dute ezagutzen, mugimendua eta joerak irudikatzen dituzte… baina denak itsaso beraren zati dira eta Atlantikaldiak ere, itsaso horretan eragin nahi du», esan dute.

Temas

Euskera

Contenido Patrocinado

Fotos

Vídeos