Omenaldi jendetsua egin zioten Periko Sanromari Haurtzaro ikastolan

Haurtzaro Atletismo Taldeko kideak bertsoa abesten publikoaren laguntzarekin.
/ARGAZKIAK BASTEROBERRI
Haurtzaro Atletismo Taldeko kideak bertsoa abesten publikoaren laguntzarekin. / ARGAZKIAK BASTEROBERRI

BASTEROBERRI OIARTZUN.

Pasa den hilaren 8an zendu zen Periko Sanroma. Haurtzaro Atletismo taldearen sortzaileetariko bat. Azken momentura arte gozatu zuen atletismoarekin, eta Haurtzaroko taldearen alde lanean.

Herenegun, hilak 19 igandea, goizetik hasi eta arratsaldera arteko omenaldia jaso zuen Perikok. Goizean, Irungo Txingudiko krosean omenaldia egin zioten. Urtero legez, Haurtzaro Atletismo taldeko kideak denboraldia hasteko Irungo krosera joan ziren. Momentu eta leku polita aitortza jasotzeko. Entrenatzaile izan zenari gehien gustatuko litzaioken moduan omenduko dute: korrika, ohorezko buelta bat emanez.

Bazkari lege ederraren ondoren, arratsaldeko 16:00etan Haurtzaro Ikastolan izan zen omenaldia, Perikok hainbeste ordu sartu zituen leku kuttunean. Guraso, atleta, lagun, familia eta hainbat eta hainbat herritar bertaratu ziren. Omenaldi jendetsu bezain hunkigarria izan zen.

Txalaparta soinuekin eta aurreskuarekin hasi zen omenaldia. Alabak eman zion sarrera hitz goxoei familiaren izenean, aita eta aitona gisa Perikok utzitako hutsunea transmititu zuen. Horren ondoren, Gipuzkoako atletismo federazioko presidenteak hitz egin zuen, Perikoren laguna ere badenak. Hortik aurrera Perikorekin atletismoan aritutako generazio ezberdinetako atletek hartu zuten hitza. Horien artean, Asier Bergaretxek, gaur egun Haurtzaro Ikastolako lehendakaria denak, atleta ohi gisa eta ikastolaren izenean hitz egin behar izan zuen. Tartean Haurtzaro Atletismo taldekoek egindako bertsoa abestu zuten publikoaren laguntzarekin, aurrez banatu baitzituzten bertso-paperak. Perikoren umorea eta bere esapideak ez ziren debalde izan, denon gogoan geratu baitira. Haurtzaro Atletismo Taldeak omenaldira bertaratu zen orori eskerrak eman nahi dizkio.

Contenido Patrocinado

Fotos

Vídeos