OKEk Logroño liderra menpean hartu zuen

Bigarren Mailako emakumeek 3-2 garaitu zuten Logroño

BASTEROBERRI OIARTZUN.

Oiartzun Kirol Elkarteko taldeek asteburu honetan ere izan dituzte partidak, beren gazi-gozoekin; batzuk garaipena eta besteak porrota.

Gizonezkoen talde gorena, Ohorezko Erregionaleko taldea, Vasconiaren aurka aritu zen asteburuan. 2-0 galduta bueltatu ziren etxera. Irabazteko partida zelakoan zelairatu ziren mutilak. Baina, ez zen zorterik izan. Aurkariek, berriz, zortea izan zuten. Tartean oiartzuarrei gol bat baliogabetu zieten; eta honek taldearen indarra itzali zuen. Gol hura ontzat eman izan balu epaileak batek daki zer gerta zitekeen. Baina balizko golekin ezin irabazi.

Aurkari gogorra hartu zuten etxean OKEko emakumeek. Liderra etorri zitzaien etxera, eta erakutsi zuen bere lidertzaren zergatia. Hala eta guztiz ere, gure neskak ez ziren kikildu eta gogor aritu ziren. Horrela, lehen zatian oiartzuarrek ez zuten aukera handirik izan. Logroñoarrek, aldiz, atera iristeko erraztasuna zuten eta markagailuan aurre hartzea ere lortu zuten. Bigarren zatian, ordea, irauli egin zen partida. Hasiera batean partidak ildo beretik jarraituko zuela bazirudien ere, bigarren zatiaren bukaera aldera oiartzuarrek indarrak hartu eta markagailuari buelta ematea lortu zuten; Malen, Nerea Abancens eta Marinaren golekin.

Neskekin jarraituz, Euskal Ligan, garaipena izan da, 0-2, Pauldarraken zelaian. Territorial kategorian etxean jokatu zuten, 0 eta 2 galdu zuten Beti Gazteren aurka. Ohorezko kadeteek 1-0 irabazi zuten Tolosaren aurka. Kadeteek Zarauzko taldearen kontra jokatu zuten, 1-2 irabazi zuten.

Mutilen taldeek denetariko emaitzak izan dituzte. Preferenteko mutilak 0-1 irabazi zuten Irunen, Mariñoren kontra. Mutilen ohorezko gazteen taldeak 3-0 irabazi zuen Vasconiaren aurka Karla Lekuonan. Lehen gazteek 1-2 galdu zuten Beti Onaren kontra. Ohorezko kadeteek 3-1 galdu zuten Antiguokoren kontra. Lehenengo kadeteek 7-0 galdu zuten Martuteneren zelaian. Ohoreko haurrek Vasconiaren aurka jokatu zuten, ez zuten irabazterik izan, 2-4 galdu baitzuten. Lehen haurrek Hondarribian izan zuten partida, 2 eta 3 irabazi zuten. Haur txikien kategorian OKEko taldeak 4-1 irabazi zuen Hondarribiarren kontra. Bukatzeko, OKEko areto futboleko taldeak Legorretan jokatu zuen, galdu egin zuen 4-2.

Contenido Patrocinado

Fotos

Vídeos