Egitarau oparoa Haurtzaro Mendi Taldearen eskutik

Haurtzaro Ikastolako mendizale taldea Oianlekun./BASTEROBERRI
Haurtzaro Ikastolako mendizale taldea Oianlekun. / BASTEROBERRI

Sei irteera atsegin bezain interesgarriak prestatu ditu Euskal Herriko txokoak ezagutzeko

BASTEROBERRIOIARTZUN.

Ikasturte berriarekin batera Haurtzaro Mendi Taldeak aurkeztu zuen aurtengo egitarau oparoa. Denera sei ibilaldi egingo dituzte ikastolako mendizaleek, horien artean bi asteburu osokoak gainera. Lehendabiziko irteera urriaren 8an burutu zuten Haurtzaroko mendizaleek. Artikutzako trenaren historia ezagutzen ibili ziren, Antton Mendizabal eta Luberri Mantelo adituekin batera. Tren horrek Artikutzatik Errenteriarako bidea Oiartzundik barrena egiten zuen XX. Mendean, eta aipatutako bikoteak gidatuta trenbidea ezagutzeko mendi-ibilaldia egin zuten. «Bidean zehar bospasei aldiz gelditu eta aztarnen azalpenak eman zizkiguten, zein baino zein interesgarriago», azaldu dute Mendi Taldeko partaideek.

Urriaren hasieran burututako ibilaldiak bazuen sorpresa atsegina ere. «Zaldingo pilatosoro inguruan pilota erakustaldia egon zen, propio guretzat prestatua», nabarmendu dute. «Han hamaiketakoa egin ondoren, Bianditz aldera abiatu eta tunela zeharkatuz, Eskas-era iritsi ginen, autobusa hartzera». Azaroaren 19an, berriz, Negu jaia ospatuko dute Haurtzaroko mendizaleek, beraz egun osoko irteera izango da. Goizean Oiartzungo mendietatik barrena ibili ondoren, gero herriko elkarte batean bilduko dira eta mahaiaren bueltan kontu-kontari ibiliko dira goizean gozatutako ibilaldiaz besteak beste. Izan ere, etxeko bazterrak ere aski politak dira bisitatzeko.

Hirugarren irteera urtarrilean egingo dute Haurtzarokoek, asteburua aprobetxatuz. Eskiatzera joango dira, urtero legez. Ilbeltzaren 27 eta 28an iraupen eskiko ikastaroa egingo dute ikastolako ikasle eta gurasoek, Somport inguruan (Aragoiko Aspe bailaran). Raketekin ibiltzeko parada ere izango dute oiartzuarrek.

Aste bukaerako irteera izango da laugarrena. Beintza-Labaien ingurua ezagutuko dute martxoaren 3 eta 4an Haurtzaroko mendizaleek. Paraje hau Nafarroa Garaiko iparraldean kokaturik dago, Malerreka eskualdean. Iruñeko merindadean dago. Orbela aterpetxean igaroko du gaua Oiartzungo espedizioak.

Maiatzaren 6an izango da bosgarren irteera, Bidarrai aldera. Iparraldean kokaturik dagoen herri horretan ikasleek hainbeste estimatzen duten rafting jaitsiera egingo dute, Errobi ibaian barrena. Ordu eta erdiko jaitsieran, primerako esperientzia izaten da animatzen diren partaideentzat.

Eta ikasturtea amaierarako geratuko da esperientziarik ederrena: Ekainaren 2an egingo den Ikastolaren eguneko ginkana mundiala. Arrakasta handien duen proposamena (250 ikaslek parte hartzen dute urtero) oso estimatua izaten da. Guraso talde bikaina aritzen da dena prestatzen eta ikasleek ederki gozatzen dute. Tirolina, Oiartzun ibaiaren jaitsiera (Altzibar-Iturriotz bitarteko tartea), bizikletan txangoa, fitxen karrera, zaku-karrera, txikorta jokoa... Aukera gaitza izaten dute lagunartean primeran pasatzeko.

Aspaldikoa dugu Haurtzaro ikastolako Mendi Taldea. 1994-95 ikasturtean egin zituen lehen urratsak, asteburuetan guraso eta ikasleei mendi bueltarako aukerak zabaltzeko asmoz. Urtero garaian garaiko ibilaldiak antolatzen dituzte guraso dinamiko eta mendizale hauek. Hogeitahiru urte, hortaz, Ikastolako ikasle nahiz gurasoei paraje ederrak ezagutzeko aukera eskaintzen. Mendizale eta naturazale oiartzuarrak badu hemendik aurrera ere noiz zer aukeratua, tarteka birikak, begiak eta gogoa lasaitzeko eta gozatzeko.

Temas

Euskera

Fotos

Vídeos