Edukiz bete-betea dator Txinpart aldizkariaren 68. alea

Jolasten, jolasten, ari naiz jolasten.../BASTEROBERRI
Jolasten, jolasten, ari naiz jolasten... / BASTEROBERRI

Zendu berri den Periko Sanromari omenaldi txiki bezain sentitua egin diote Haurtzaro Ikastolako aldizkarian

BASTEROBERRIOIARTZUN.

Dagoeneko argitaratu dute Haurtzaro Ikastolaren Txinpart aldizkariaren 68. alea, edukiz betea. Herriko familiek eta Oiartzungo elkarteetako ordezkariek dagoeneko esku artean izango dute azkeneko Txinpart aldizkariko alea. Izan ere, Gabonetako oporrekin batera banatu zuten pasa berri den hiruhilekoari dagokion kronika idatzia.

«Ikasturte berriarekin batera hasi ginen Txinpart ale berri hau prestatzen. Kontu interesgarri asko bildu ditugu eta edukiz bete-beteta dator aurtengoa ere», adierazi du Maribi Alonso Txinparteko arduradunak. «Aurtengo berrikuntzen artean, HH marko berriaren abiaraztea dugu; udan egin ditugun obren argazki batzuk topatuko ditu irakurleak aldizkarian. Baina ez da hori aurten dugun berrikuntza bakarra, Orientazio departamentua ere eraberritu dugu. Orain arte arduraduna zen Miren Garbizuk aurre-erretiroa hartu du, eta horrek berregituraketa bat ekarri du. Hiru kide ditugu bertan, eta talde aparta osatzen dute. Berrikuntzekin amaitzeko, ezin ahaztu idazkari berria ere badugula. Arantza Urbietak ere aurre-erretiroa hartu du eta Oihana Irastorza dugu haren ordez gure artean», gaineratu du Alonsok.

Hogeita hamabi orriz osatutako alean, «gure proiektu batzuk ere ekarri ditugu orriotara, hala nola Golden 5en inguruan aurkezpen bat jaso dugu, bai familientzat, baita langileontzat ere, gure egunerokoan, beharrezko dugun ikuspegi hezigarri bat izaten laguntzen digun tresna», zehaztu du Txinpart aldizkariaren arduradunak. Era berean, «HHko zenbait guraso ere lanean ibiliak dira eta HHko eremu berriaren kanpoaldeko lorategiari bizitza berri bat eman diote, elkarlanean eta ilusioz beterik». Proiektu horren aipamena ere jaso dute Txinpartekoek.

Eta aurreko Txinpartetan egiten zen modura, 3 urtetik hasi eta 16 urte bitarte hiruhileko honetan ikasleek jorratu duten gairen bat jaso dute ale berrian, hala nola: jolastearen eta mugimenduaren garrantzia; denboraren makina; erdi aroa; gure txoko kuttuna; Zumetaren antzera; fortnight inmersion to explorers; bertso emanaldia; KIVA eguna; musika instrumentua; zazpi egun Bretainian eta Euskal Herriko matematikariak.

Azken ale honetan Haurtzaroko familiak bereziki gogora ekarri nahi izan du zendu berri den Periko Sanroma, Haurtzaro Ikastolako Atletismo Taldeko fundatzaile, entrenatzaile eta alma mater. «Ale honetatik omenaldi txiki bat egin nahi izan diogu, 33 urtez ikastolako pistak gazteen ilusio, kemen eta izerdiz bete dituen gizon bitxi bezain maitagarriari», adierazi du hunkituta Alonsok.

Bukatzeko, ikastolan hain garrantzitsuak diren beste gai batzuk ere jaso dituzte Txinpart ale berrian: Eskuttun, urtez urte euskararen alde; eskolaz kanpoko ikasgaien eskaintza; Haurtzaro Mendi Taldearen urteko egitaraua; DBHko gurasoen prestakuntza: EKI...

Contenido Patrocinado

Fotos

Vídeos