Bihar hasiko dira Udalak egingo dituen auzo-batzarrak

Larzabalgo aparkalekua berritua.
/BASTEROBERRI
Larzabalgo aparkalekua berritua. / BASTEROBERRI

Lehenengoak Arraguan eta Iturriotzen izango dira, 19:30ean

BASTEROBERRI OIARTZUN.

Aurreko urtean egindako auzo batzarretan eskatutako proiektuak gauzatzen ari da Udala. Auzo guztietan egin dira auzotarren eskaeratatik abiatutako lanak. Oiartzungo Udalak legegintzaldi honetan, eta batez ere 2017an zehar, auzotarrek auzo batzarretan egindako eskaeretatik eta adostutako lehentasunetatik abiatutako aktuazioak egin ditu. Horren berri emateko egingo ditu auzo batzar hauek Udalak. Aukera ezin hobea da kezkak partekatzeko, eta zita horiek baliatzeko deia egin du Udalak.

Arraguan, legegintzaldi honetan Larzabalko aparkalekua txukundu da eta inguru horretan kirol aniztuneko pista jarri da. Talaiako espaloia txukuntzeko lanak ere egin ziren. Topoko bidearen azpian pin-pon mahaia jarri da Larzabalen eta inguru horretan, taxientzako tokia egokitu da, Taxilarien Elkartearen eskariz. Zubiondoko terraza konpontzeko lanak ere egin dira, bizilagunek hala eskatuta.

Herribideen konponketak Iturriotz auzoko bizilagunen kezka ere izan da, eta horregatik, Udalak auzo honetan ere egin ditu zenbait lan. Tronpeoko trafikoaren berrantolaketa izan da auzotarren eskariz landu den beste gai bat. Bidezarra bidean espaloia egiteko eskaera ere ase da. Beheko Soroan helduek gimnasia egiteko gailuak jarri dira auzotarrek hala eskatuta. Gainera, Xorrolako geltokiari kokapen berria eta aterpea jarri zaizkio.

Aipatu ditugun lan hauez gain, mantenu lan ttikiagoak ere egin dira auzo guztietan. Gehienak, auzo batzarretan auzotarrek egunerokoan ikusten dituzten arazo eta hobetu daitezken eremuak Udalari trasladatu dizkiotelako. Aukera ezin hobea da kezkak partekatzeko, eta zita horiek baliatzeko deia egin nahi dugu udaletik.

Epe motzean, auzoetako eskaeretatik abiatutako beste zenbait lan garrantzitsu martxan jarriko dira. Bihar azalduko dizkiete hauek Arraguako eta Iturriozko auzotarrei.

Arraguako kasuan, Ganboxa ingurua eta aparkalekua txukuntzeko lanak izango dira aurtengo aurrekontuaren barruan onartuak daudenak. Iturriotzen, berriz, Altzibar eta Iturriotz lotzen dituen espaloia konpondu eta argiztatzea.

Lan hauek noiz hasiko diren zehatz-mehatz ezin du esan oraindik Udalak, baina urtea bukatu aurretik edo 2018 hasieran hasiko dira guztiak.

Contenido Patrocinado

Fotos

Vídeos