«Azkena izan dadila» lelopean hasi eta bukatu zen igandeko bertso saioa

Alaia Martin Etxebeste oiartzuarra kantari./BASTEROBERRI
Alaia Martin Etxebeste oiartzuarra kantari. / BASTEROBERRI

BASTEROBERRIOIARTZUN.

Joan den igandean, urteko lehen igandean urtero Etxerat elkarteak antolatzen duen bertso-saioa izan zen Elorsoro kiroldegian, arratsaldeko 17:30ean hasita. Bi orduko bertso saio zirraragarria izan zen. Bertsolari Txapelketa Nagusiko BECeko finalean parte hartu zuten bertsolariak izan ziren oholtzan, Unai Agirre izan ezik. Bere postuan Alaia Martin herritarra izan zen. Bertsolariak gidatuz Amaia Agirre jardun zen gai-jartzaile.

Bertsolarien agurrekin hasi zen saioa. Agurretan azpimarragarriena Amets Arzallusena izan zen. Kate eta gurpilekin egindako hitz-jokoa. Elurra zela eta autoen gurpilei jarri beharreko kateak eta presoak gerturatzeko kateei jarri beharreko gurpilekin egindako hitz joko bizi eta trebea. Publikoa liluraturik utzi zuen hasieratik bertsolariak.

Jarraian, ariketekin hasi ziren denetik izan zen: gai gazi zein gozoak, gai konprometituak eta gai umoretsuak. Publikoak ez zuen aspertzeko betarik izan. Aurten ahoz aho dabilen gaia izanik ume motxiladunena, hura izan zen protagonista. Motxiladun ume den Ize Andueza Zubimendi igo zen oholtzara Aitor Mendiluze eta Igor Elortzari motxila pare bat emanez eta umeen larruan jartzeko eskatu zien. Ederki bete zuten eskatutakoa.

Ariketa horren ostean saioak umorerako pausu garbia eman zuen, baita bat-batekoa ere. Segidan, auto-karabana hartu eta eskiatzera joandako koadrilaren paperean jarri behar izan zuten. Gerora, Oiartzungo Bertso eskolako hiru gazte ere igo ziren taula gainera, Aitor Sarriegi, Amets Arzallus eta Aitor Mendiluze zirikatzeko gogoz.

Bakarka atera zen ondoren bertsolari añorgarra. Beñat Gaztelumendiren habanerak ere jendearen kuttunen artean ziren saioaren ondoko komentarioetan. Hiru bertso kantatu zituen, Agirrek puntu erdian oinak emanda. Añorgarraren abileziak miretsita zuen publikoa. Bere amonaren paperean jarri zuen gai-jartzaileak, abenduaren 17an, telebistaz txapelketako finala ikusten. Bakarka segiz, Igor Elortzari tokatu zitzaion «hitza» gai hartuta aritu behar izan zuen bertsotan.

Sustrai Colina, Beñat Gaztelumendi eta Alaia Martin hurrengo bertsoetan aritu ziren. Sustrai iaz sarrerarik gabe geratu zen, aurten ordea sarrerak garaiz hartu zituen eta lehenengotarikoa izan zen saiora sartzen leku onena hartzeko, halaxe egin zuen. Baina, gero izugarrizko gizonkotea eseri zitzaion aurrean -Beñat. Hori gutxi ez eta alboan Alaia, krispetak jaten ari zen umea. Gaiari umorez heldu zioten eta tirabiran aritu ziren zein baino zein gehiago bertsotan.

Saioaren azken bertsoaldietara hurbilduz, Amets eta Maialen atera zituen Agirrek mikrofonora. Oiartzungo udaltzaingoaren paperean sartu behar izan zuten. Saioa amaitzeko bukaerako agurrak egin zituzten bertsolariek. Alaiak, herrikoa izanik, joan den ostegunean espetxetik ateratako Joxean herritarra ekarri zuen ahora.

Contenido Patrocinado

Fotos

Vídeos