Diario Vasco

Herri bazkaria gaur Arragua auzoko festetan

Giro ezin hobean burutu da bazkaria.
Giro ezin hobean burutu da bazkaria.
  • Arratsaldean, danborrada izango da eta bihar, puzgarriak eta pailazoak

Festarako gogoa daukanak Arragua auzora jo beharko du asteburu honetan. Izan ere, giro paregabean ospatzen ari dira bertan Oiartzun bailarako lehen jaiak. Atzo, jubilatuen bazkariarekin eman zioten jarraipena aurreko asteburuan hasitako festei. Gero, bota zuten suziria eta ondorengo ikuskizunetan bildu zen auzotar ugari, baita kanpotik etorritako mordoxka ere.

Gaur, berriz, goizeko 10:00etan hasiko da festa giroa auzoan, trikitilarien dianarekin. Gero, Haurtzaro Ikastolako dantzarien eta bertsolarien emanaldia izango da frontoian. Herri bazkaria ere ez da faltako, 14:00etatik aurrera. Egunak, ordea, emango du besterik. Zozketak, sariak, bingoa... 19:00etan auzoko artisten eskutik Danborrada izango da. Gero, afaria eskainiko dute frontoian 5 euroren truke nahi duenarentzat. Azkenik, DJ XABarekin dan-tzaldia izango da... aspertu arte.

Eta bihar izango da egunik handiena. Goizeko 09:00etan, meza ospatuko dute, auzoan azken urtean hildakoen alde. Gero, diana izango da Oiartzungo Lartaungo txistulariekin. Eta 10:30ak aldera, pilota partidak hasiko dira Oiarperen eskutik. Haurrentzat, berriz, 11:00etan zabalduko dute haur jolas parkearen lehenengo saioa. Gero, 12:30ean txoka txapelketa hasiko da.

Arratsaldean, 15:30ean jolas parkea eta puzgarriak (bigarren saioa). III. Bizkotxo Lehiaketa izango da gero. Parte-hartzaileek 17:00etarako etxean egindako bizkotxoak aurkeztu beharko dituzte eta epaimahaiak erabakiko du zein diren aurtengo hiru onenak. Horren ondoren, Irrien Lagunak taldeko pailazoak izango dira. Largabista, Marikalambre, Martinber eta Tiritatxok 'Irrikula-makula kriskitin dzart' ikuskizuna eskainiko dute. Azkenik, txokolate gozoa dastatuz eta zezensuzkoekin amaituko dituzte aurtengo festak.

Recibe nuestras newsletters en tu email

Apúntate