Diario Vasco

Heldu direla Intxixuak eta Sorginak Kataxulotik, jarri zakuak pronto!

Intxixuak eta Sorginak heldu dira Kataxulotik.
Intxixuak eta Sorginak heldu dira Kataxulotik. / GOIZARIN
  • Burrunbaaarekin lehertuko da festa, datorren ostiralean

Badatoz Ihoteak! Ihote Taldeak antolatuta, heldu den ostiraletik igandera bitartean In-txixuak, Sorginak, zakuak eta Kuestazioa izango dira herrian, inauterien aurreko asteburuan.

Ihoteak Oiartzungo ondare kulturalaren parte dira. Ihote Taldeak lan handia egiten jarraitzen du aspaldiko ohiturak berreskuratzen. Udalak taldearen ekimenekin bat egin du eta horiek bultzatzen ditu, herriko ondare kulturala gordetzen eta ezagutarazten laguntzen duelakoan. Horregatik, herritarrak animatu ditu heldu den asteburuan, hotzari aurre eginez, Ihote Taldeak antolatu dituen ekintzetan parte hartzera.

Egitarau oparoa, aurten ere

Ostiralean, hilak 17, arratsaldeko 16:45ean lehertuko da festa. Beheko plazako biribilgunetik abiatuko da Burrunbaaa!, Ihoteei deia egiteko. Batukada moduan, Doneztebe plazara igoko dira gazte nahiz helduak, giro bikaina jarriz herriko bazterretan. Plazan, gero, txokolate gozoa eskainiko dute, indarrak berreskuratzeko.

Horren ondoren, plazaren apainketari helduko zaio. Eta festak aurrera jarraituko du Azeri- eta Sorgin-dantzarekin, 19:00etan. Ordu erdi beranduago Intxixuek eta Sorginek plaza hartuko dute eta auzoetako banderen igoera izango da. Gero, tabernaz taberna poteoa, denak zakuz jantzita.

Kuestazioa, larunbatean

Larunbat goizean, hilak 18, Oiar-tzungo ohitura zaharrari jarraituz, auzoetako taldeek etxez etxe eta baserriz baserri festa giroan Kuestazioa egingo dute, goizeko 09:00etan abiatuta. Poxpolinez jantzita joan behar dela gogoratu dute antolatzaileek. Hurrengo hitzordua 14:30ean jarri dute. Auzoetan barrena ibilitako koadrila bakoitzak bere elkartean egingo du bazkari legea. Gero, arratsaldeko 18:00etan Doneztebe plazara abiatuko dira, jai giroan. Azkenik, «Eonian» elektro-txarangarekin poteoa izango da tabernaz taberna. Igandean, hilak 19, goizeko 09:00etan Lartaun Txistulari taldeak Diana joko du; 11:00etan Beheko plazatik karroxa eta kalejira alaia abiatuko dira; eta azkenik, iluntzeko 19:00etan Intxixu eta Sorginei agurra emateko tenorea iritsiko da. Bukatzeko, suzko akerra ibiliko da plazatik barrena.

Ihoteetako dantzak ikasi

Eta festa herrikoi horietan behar den bezala murgiltzeko Soinuenea Fundazioak eta Abaraxkako lagunek hirugarrenez tailerrak antolatu dituzte Ergoien auzoan. Hitzordua gaur arratsalderako (17:00) jarri dute Soinuenea-Herri Musikaren Txokoan. «Batetik, dantza tailerra jarriko dugu martxan Ihote dantza taldeko eta Jon Ansorena txistulariarekin», adierazi dute Soinueneako arduradunek. Horrela, Auzokalte elkartearen aurreko aldean dantzak ikasi edota gogoratuko dituzte. Era berean, Abaraxkako lagunekin Ihoteetako zakua apain-tzeko aukera izango da.

Webgune berria

Oiartzungo Ihoteak taldeak webgune berria estreinatu du aurten. Hauxe da helbidea: oiartzungoihotik.eus eta bertan informazio guztia jarriko du herritarren eskura. Zabaleku Informatika arduratu da webgune berriaren diseinuaz eta garapenaz. «Argazkiak ere hortxe zintzilikatuko ditugu», adierazi dute taldekideek. Jarraipena egiteak merezi du, oso orrialde txukuna sortu dute eta.

Recibe nuestras newsletters en tu email

Apúntate