Diario Vasco

Oiartzun taldea bitan aurreratu bazen ere, ez zuen abantaila aprobetxatzen asmatu

Hamaikako hau zelairatu zuen Txema Frailek Karla Lekuona zelaian.
Hamaikako hau zelairatu zuen Txema Frailek Karla Lekuona zelaian. / GOIZARIN
  • Lehen itzuliko azken neurketan, 2 eta 2 berdindu zuen Zaragoza taldearen aurka, Pedro Sancho zelaian

Pasa den igandean, Oiartzun taldeari denboraldiko aurreneko garaipenak ihes egin zion eta puntu bakarrarekin konformatu behar izan zuen Zaragozaren zelaian. Izan ere, Gari Argoteren jokalariak bitan aurreratu ziren markagailuan baina aragoiarrek neurketa orekatzen asmatu zuten eta 2-2 amaitu zen norgehiagoka.

Lehen zatian Oiartzun taldeak oso joko ona erakutsi zuen, denboraldiko onena, eta zelaian ongi kokatuta jokatu zuten Gari Argoteren jokalariek. Horren lekuko 22. minutuan Carol Gonzalez aurrelariak sartutako tantoa kontraeraso batean. Zaragozako jokalariak baloiaren jabe baziren ere, haien erasoak kamutsak ziren gehienetan eta atsedenaldira aurretik joan ziren oiar-tzuarrak.

Bigarren zatian, berriz, etxekoek aurreratuta jokatu zuten eta 9. minuturako lortu zuten neurketa berdintzea harrobiko Marta Cardonaren tantoari esker. Baina oiartzuarrek ez zuten etsi eta Errenteriako Ane Perez jokalariak lortu zuen berriro Oiartzun taldea aurreratzea buruz sartutako tantoa medio. Orduantxe Zaragozako defentsa batek, Minori Chibak, min hartu zuen, tibia eta perone hautsi zituen-eta. Hamabost minutuz partida etenda egon bazen ere, berriro ekin ziotenean Zaragozak izugarri erasotu zion Oiartzun taldeari eta saria jaso zuen 89. minutuan Paraguaiko Gloria Villamayorrek sartutako golari esker. Amaieran, 2-2 markagailuan eta puntu bakarrarekin konformatu behar izan zen azkenean.

Honako hamaikakoa zelairatu zuen Gari Argotek: Oihana Aldai, Ane Pérez (Nerea Murua, 98. m.), Nerea Abancens, Joana Arranz, Silvia Ruiz, Carol González, Anne Mugarza, Jone Bilbo, Irantzu Ibarrola, Sara Olaizola (Maria, 90. m.) eta Evelyn Santos (Amaia Vázquez, 98. m.). Bosgarren puntua batuta, Oiar-tzun taldea azken aurreko koskara igo da eta bost puntura dauka igoera postua.

Datorren asteburuan konpromiso handiko neurketa izango du Spanyol taldearen aurka, Bartzelonako Dani Jarque zelaian. Katalanak 10 punturekin daude, pasa den igandean bilbotarren aurka 1-1 berdinduta.

2-1 irabazi du Ohorezkoak

Urte berria garaipenarekin estreinatu du Ohorezko Erregional taldeak, Karla Lekuona zelaian. Zaleen aurrean partida bikaina jokatu zuen pasa den larunbatean eta 2-1 nagusitu zen Aretxabaletaren aurka.

Neurketa hasi orduko, erasoan hasi ziren Txema Fraileren jokalariak eta hamaikagarren minuturako aurreratu zuten, Beñat Diezen tantoari esker. Nolanahi ere, etxekoen pozak oso gutxi iraun zuen, zortzi minutu ondoren berdindu baitzuen Aretxabaletak, Fernandezen gola medio. Baina garaipena zuen helburu Oiartzun taldeak eta jokoan jarraitu zuen atsedenaldira joateko garaian aurreratzea lortu baizuen, Eñaut Fernandezek penaltia gauzatu zuenean.

Bigarren zatian, gauzak ez ziren gehiegi aldatu: Oiartzun taldeak jarraitzen zuen neurketa goberna tzen. Baina partida amaitzeko 20 minutu falta zirela Marin jokalariaren kanporaketak, zaleen haserrerako, Aretxabaletako jokalariak aurrera-tzea ekarri zuen eta oiartzuarrak sufritzen hasi ziren. Bigarren berdinketa maisuki saihestu zuen Orokieta atezainak eta amaieran hiru puntuak etxean geratu ziren, jokalarien eta zaleen gozamenerako.

Honako hamaikakoa zelairatu zuen Txema Frailek: Orokieta, Beñat Diaz, Salazar, Loperena, Marin, Sistiaga (Dani, 78. m.), Eñaut, Garmendia, Mikel (Gonzalez, 53. m.), Iribarren (Artola, 81. m.) eta Manzisidor (Kevin, 70. m.).

Hamaikagarren koskan dago orain Oiartzun taldea, 23 punturekin. Hurrengo asteburuan lehen itzuliko azken partida jokatuko du Txema Fraileren taldeak, eskualdeko futbol derbia hain zuzen. Touring taldearen aurka jokatuko baitu, Fanderiako zelaian. Rotetaren jokalariak 10. postuan daude, 24 punturekin. Errenteriko taldeak husna berdindu zuen azken partidan, Hondarribiaren aurka.

Recibe nuestras newsletters en tu email

Apúntate