Diario Vasco

Elika Kooperatiba hasi da lanean Makutsoko agroaldean

Elika Kooperatiba hasi da  lanean Makutsoko agroaldean
  • Kooperatibak aurkezpen saioa egingo du hilaren 13an Jakoba Errekondo gonbidatuarekin, udal areto nagusian

Udazkenarekin batera, Oiartzungo Udalak jakinarazi zuen Iturriotz auzoko Makutso agroaldean jarduera profesionalerako bi baratze martxan jarriko zirela. Lehenengo sektorea biziberritzeko Udalak -Behemendiren eta Gipuzkoako Foru Aldundiaren laguntzarekin- martxan jarri duen «Lurbizi» egitasmoko aurreneko proiektua da Iturriotz auzokoa. Eremuak esleitzeko Behemendik lehiaketa publikoa egin zuen eta hango emaitzen ondoren, Arraztalo Elkarteak eta Elika Kooperatibak landuko dituzte baratzeak.

Udatik hona, Behemendi eremua baratzegintzarako egokitzeko lanak gauzatzen hasi zen, ur-hartuneak prestatuaz, baratze sailetarako sarrera egokituz, lurraren analisiak egin eta erabilera gomendio batzuk ere proposatuz, materialarentzako kaxotak jarri eta lurra goldatuz.

Makutsoko agroaldean Arraztalo Elkarteaz gain Elika kooperatiba ariko da lanean. Elika Kooperatiba Oiartzungo herritar talde batek sortu du, elikadura burujabetzaren bidea jorratzeko. «Hiru urte daramatzagu proiektua hezurmamitzen», dio gogotsu Jon Etxebeste oiartzuarrak. Herriko hamar lagun gabiltza jo eta ke lanean proiektua gauzatzeko. Ez da lan erraza izan baina orain oso gustura gabiltza, abiatzeko tenorean gaude-eta», gaineratu du. Proiektu berriek sortzen duten zirrara nabaritzen zaio egiten dituen adierazpenetan. «Orain arte egindako bidean, lur sail egokia lortzea izan da oztoporik handiena, baina Makutsokoa gauzatzearekin batera zerua zabaltzen hasi da guretzat», aitortu du. «Gure kooperatibaren lurrak bi nekazari gazte oiartzuarrek landuko dituzte: Jakobe Beramendik eta Joritz Mitxelenak», nabarmendu du. «Dagoeneko negutegiak jartzen ari gara. Bigarren eskukoak erosi genituen Funesen (Nafarroa) eta Makutsoko lur saila ari gara egokitzen». Ziklo naturala jarraituz, udan hasiko dira uzta jasotzen. «Nolanahi ere, lehen urtea saiakera modukoa izango da».

Kooperatibaren filosofia

«Gure asmoa Oiartzungo nekazarien lana bultzatzea da, garaikoa era naturalean ekoitziz eta oiartzuarrei bertako barazkiak eskainiz kontsumitzaileekin tratu zuzen bidez», azpimarratu du Etxebestek. Herriko komertzio eta jantoki-zerbitzua duten erakundeei (ikastetxeak, zaharren egoitza...) euren produktuak eskaintzeko asmoa ere badute. Era berean, herrian kontsumo talde bat antolatu nahi dute, Arraztalo Elkarteak egin duen antzera.

«Ekoizpen ekologikoa sustatu nahi dugu. Hori oso garbi daukagu. Garaian garaiko barazkiak ekoitziko ditugu. Gainera, ENEEKen zigilua lortzeko asmoa ere badugu», adierazi du Elikako kooperatibistak.

Hilaren 13an aurkezpena

Elika Kooperatibako kideak lanean murgildurik badabiltza ere, herri mailan hilaren 13an aurkeztuko dute arratsaldeko 18:30ean, udal areto nagusian. «Jakoba Errekondo gonbidatu dugu, agronomo eta paisajista ezaguna 'Bizi baratzea' liburuaren egilea», nabarmendu du Etxebestek. «Herritarrak ere gonbidatu nahi ditugu aurkezpen saiora, gure proiektua gertutik ezagutu dezaten», dio pozik.

Recibe nuestras newsletters en tu email

Apúntate