Diario Vasco

Ameriketako hizkuntza gutxituei buruzko
mahai-ingurua egin zen atzo

Atzo arratsaldean, Garabide Elkarteak eta Oiargungo Udalak elkarlanean antolatutako 'Enbido txikira!' mahai-ingurua izan zen udaletxeko areto nagusian. Hizkuntza Biziberritzeko Estrategiak ikastaroko parte-hartzaileen lekukotasunak ezagutzeko aukera izan zuten bertaratu ziren lagunek.

Hego eta Erdi Amerikako hizkun-tza gutxituen egoeraren berri eman zuten Filomena Nina Huarcachok (aimara, Bolivia); Horacio Ulcuek (nasak, Kolonbia); Jose Angel Koyocek (maia yukatekoa, Mexiko) eta Saraguro Intiraimi Cartuchek (kitxua, Ekuador).

Euren egoera azaltzeaz gain, euskaldunek euskara biziberritzeko duten estrategian ikusten dituzten argi-ilunak ere aipatu zituzten.

Herriko bi ikastetxeetan

Atzokoan, bi ikastetxeetara ere gerturatu ziren Hego eta Erdi Amerikako lagunak. Derrigorrezko Bigarren Hezkuntzako ikasleekin jardun zuten eta euren bizipenak eta esperientzia partekatu zituzten herriko gaztetxoekin.

Gogoratu Garabidek antolatutako Hizkuntza Biziberritzeko Aditu titulua eskuratzen aritu direla azken bi hilabeteetan. Izan ere, hizkuntza gutxituen kooperazioan jarduten du Garabide Elkarteak. Kooperazio horren baitan, bi urtez behin Aditu Titulua eskaintzen die Amerika, Asia eta Afrikako hizkuntza gutxituetako eragile izan daitezkeneei, euskararen biziberritzean egindako pausoak azaldu eta euren komunitateetan proiektuak martxan jartzen laguntzeko.

Oiartzungo Udalak Garabide diruz laguntzen du, hizkuntzaren eta kooperazioaren arloan lanean jarraitzeko baliabideak izan ditzan.

Temas

Recibe nuestras newsletters en tu email

Apúntate