Diario Vasco

Euskal Ligako neskek 0-2 galtzen joan arren, partida irauli eta 3-2 irabazi zuten

Euskal Ligako taldeak lider jarraitzen du beste astebetez.
Euskal Ligako taldeak lider jarraitzen du beste astebetez. / GOIZARIN

Pasa den igandean jokatu zuen Oiartzun Kirol Elkarteko Euskal Ligako nesken taldeak, Karla Lekuona zelaian. Aurrez aurre Bizkaiko Berri Otxoa taldea zeukan eta ederki kostata baina 3-2 gailendu ziren oiartzuarrak. Izan ere, partida hasi eta berehala aurreratu ziren bizkaitarrak, arrisku handiko falta bat sakatu ondoren. Teresa kapitainak lortu zuen lehen tantoa bilbotarrentzat. Bigarrena ere haiek sartu zuten. Baina hor amaitu ziren haien lanak. Izan ere, oiartzuarrak poliki-poliki euren jokoaren jabe egiten hasi ziren eta banaka-banaka hiru tanto sartzea lortu zuten. Lehen biak Nekane Quiñones atzelariak bideratu zituen; azkena, berriz, Alazne Inziarte 'Lolok" firmatu zuen, eskuadran tanto ederra eginez. Amaieran 3-2 eta hiru puntuak etxerako.

Honako hamaikakoa zelairatu zuen Arregik igandean: Olatz Hoyos, Nekane Quiñones, Nagore Isasa, Maria Granado, Alazne Inziarte, Ane Oiartzabal, Garazi Díaz de Guereño, Irati Huitzi, Sara Olaizola, Leire Morán eta Enara Louvelli.

Hamabigarren jardunaldiko partida irabazita sendo jarraitzen du Euskal Ligako Oiartzun taldeak lider, 34 punturekin. Izan ere, oraindik ez daki zer den neurketa bat bera ere galtzea denboraldi honetan. Orain arte jokatutako 12 partidatik, 11 irabazi dituzte Aritz Arregiren jokalariek eta bakarra berdindu.

Ohorezko Erregional 2-2

Bi kolore izan zituen larunbateko partidak, Karla Lekuona zelaian. Lehendabizikoa etxekoentzat izan zen eta Garmendiak sartutako tantoari esker oiartzuarrak aurretik joan ziren aldageletara. Bigarrena, ordea, Zarautzek eraman zuen. Izan ere, atsedenaren ondoren partidaren bila zihoazela ederki erakutsi zuten zarauztarrek. Gauzak horrela, berdinketa egin zuten eta haien hanka-sartze batean aurreratu ziren berriz ere Txema Fraileren mutilak, Manzisidorren tantoa medio. Nolanahi ere, zarauztarrek estutzen jarraitu zuten eta berdinketa erdietsi zuten. Azkenean, puntu banaketa Karla Lekuonan.

Honako hamaikakoa zelairatu zuen Frailek: Orokieta, Beñat Diaz, Salazar, Loperena, Dani, Gonzalez, Manzisidor (Mikel, 83. m.), Sistiaga (Artola, 57. m.), Garmendia (Ibai, 70. m.), Iribarren (Jon Mikel, 87. m.) eta Izagirre (Montes, 75. m.).

Bartzelona Karla Lekuonan

Pasa den aste bukaerako atsedenaldiaren ondoren, datorren larunbatean jokatuko du 1. mailako Oiartzun taldeak denboraldiko 12. jardunaldia, etxean. Lehenengo koskan dagoen Bartzelona taldea izango dute-eta aurrez aurre, Karla Lekuona zelaian.

Puntu premia larrian daude oiartzuarrak, jaitsiera postuetan baitaude dagoneko, lau punturekin. Aurtengo denboraldian, Gari Argoteren jokalariek ez dakite oraindik zer den partida bat irabaztea, eta hori lortzeko ahaleginean lan egingo dute hurrengo larunbatean.

Hitzordua goizeko 10:45ean jarri dute, Karla Lekuona zelaian.

Recibe nuestras newsletters en tu email

Apúntate