Diario Vasco

Abian da biolentzia matxista jasan duten emakumeentzako autolaguntza tailerra

  • Oiartzungo emakumeek ere parte hartu dezakete eskualdeko mailako programan

Biolentzia matxista jasan dute edo jasaten duten emakumeentzako autolaguntza tailerra martxan dago bigarren urtez eskualdeko lau Udalen lankidetzari esker. Taldearen laguntzarekin, bizi duten egoeratik ateratzeko norberak bere errealitatearen, baliabideen eta indarren arabera erabakiak hartzea da tailerraren helburua.

Eskualde mailako proiektua da. Astean bi orduko saioa izaten da Errenterian (asteazkenetan, 17:30etik 19:30era, Merkatuzarren). Saioak elebitan izaten dira eta Sorburu taldea da dinamizatzailea.

Konfidentzialtasuna eta anonimotasuna erabat bermatzen da saioetan. Asistentzia ere bakoitzaren beharren eta premien araberakoa da. Ekaina arte, nahi denean gehitu daiteke taldera. Baldintza bakarra dago: besteen erritmoak eta erabakiak ere errespetatzea.

Autolaguntza tailerrera joateko haurtzaindegi zerbitzua behar duenak Oiartzungo udaletxeko Gizarte-Ongizate zerbitzuan eska dezake (gizarte@oiartzun.org helbide elektronikoan edo 943 49 05 52 telefono zenbakian), hiru egun lehenago.

Autolaguntza tailerrak arlo askotako gaiak jorratzen ditu indarkeriarik gabe bizitzeko nahia duten emakumeekin: beldurrak nola bideratu; zalantzak eta kezkak erantzun; entzunak eta errespetatuak izateko; baliabide eta laguntzei buruz informatu; hitz egiteko eta elkar entzuteko espazioa sortu; elkar laguntzeko; indarkeria, tratu txar eta irainetik nola irteni ikasteko...

Recibe nuestras newsletters en tu email

Apúntate