Diario Vasco

Sare sozialetako biolentzia matxistari buruzko hitzaldia izango da bihar

Hipatia lorategiaren aurrean elkartutako lagunak.
Hipatia lorategiaren aurrean elkartutako lagunak. / GOIZARIN

Bihar arratsaldeko 17:30ean, Lahia-Nahia Sexologia Elkarteko kideek 'Indarkeria matxista sare sozialen bidez' hitzaldia eskainiko dute Manuel Lekuona bibliotekan. 15 urtez goitiko gazteei zuzendutako saioa izango da, DBH 4. mailatik gorako ikasleentzat hain zuzen.

Sare sozialetan indarkeria matxista identifikatzen eta sare horien bidez zabaltzen diren mezuak eta horien eraginen gaineko zalantzak argitzeko eta hausnartzeko tartea izango da hitzaldi hau. Alegia, sare sozialetako indarkeria matxistaren zergatiak, ondorioak eta eraginak aztertzeko.

Emakumeenganako Indarkeriaren Kontrako Nazioarteko Egunaren harira herrian antolatutako ekimenak pasa den igandean hasi ziren. Herriko feministen asanbladak deituta, argazkia egin zen Hipatia lorategiaren aurreko aldean. Bestalde, atzo zabaldu zen Haurtzaro Ikastolako ikasleek egindako lanen erakusketa, udal areto nagusian. Igande bitarte izango da ikusgai. Azkenik, datorren ostiralean, bi ekitaldi izango dira. Batetik, zineforum saioa izango da. 'La teta asustada' ikusteko parada izango da udaletxeko areto nagusian, arratsaldeko 17:00etan.

Bestetik, beranduago elkarretaratzea hasiko da Doneztebe plazan, iluntzeko 19:30ean hain zuzen.

Recibe nuestras newsletters en tu email

Apúntate