Diario Vasco

Musikaz blai Oiartzunen, Santa Zeziliaren omenez

Ibargain Musika eskolako kideak atzoko kantaldian.
Ibargain Musika eskolako kideak atzoko kantaldian. / GOIZARIN
  • Igandean egin zen III. Jose Manuel Azkue memoriala; atzo, Ibargain Musika Eskolako kideek alaitu zituzten kaleak

Santa Zezilia musikarien eguna da gaur eta Lartaun txistularien taldea ariko da herriko kaleak alaitzen. Era berean, pasa den igandean ospatu zen Jose Manuel Azkue organista oiartzuarraren omenezko hirugarren memoriala, San Esteban parrokian. Atzo, berriz, Ibargain Musika eskolako kideek hartu zuten kaleak alaitzeko lekukoa.

Mahai-inguruak zabaldu zuen ekitaldia. Ana Belen Garcia organista, Maddalen Dorronsoro Koru zuzendaria eta Antton Mendizabal 'Oiartzungo organo zaleak' taldeko kidea izan ziren hizlari eta Jose Manuel Azkue organista oiartzuarra izan zuten hizpide. Gero, Oiartzungo parrokian dagoen organoaz min-tzatu ziren eta azkenik, kontzertuaren xehetasunak azaldu zituzten. Kontzertua entzutera herritar ugari animatu ziren eta izugarri gozatu zuten Oiartzungo Lartaun Abesbatzak (Maddalen Dorronsoro zuzendari zela) eta Ana Belen Garcia organojoleak eskainitako kontzertuarekin. Besteak beste, C. Frank, Ch. Gounod, M. Mola, N. Hakim, J. Guridi eta G. Fauré musikarien piezak eskaini zituzten. Propio jarritako pantaila handian ikusi zuten kontzertua parrokiara gerturatu ziren herritar musikazaleek.

Musika Eskolako kideak, atzo

Atzo Ibargain Musika Eskolako musikarien txanda izan zen. Arratsaldeko 17:45ak aldera musika eskolako ikasle eta irakasleak eskolako atarian bildu eta Aialde kalean zehar Done Eztebe plazara igo ziren kantari eta soinu-tresnak joaz, harmonia ederrean. Plazara iristean, udaletxearen aurrean abesti ezagunez osatutako kantaldi laburra eskaini zuten. Plazako saioaren ondoren, ikasle eta irakasleek eskolarako bidea hartu eta kantari eman zioten atzoko egunari bukaera.

Recibe nuestras newsletters en tu email

Apúntate