Diario Vasco

Jose Manuel Azkue organistaren omenezko hirugarren memoriala, igandean

Datorren igandean, hilak 20, Jose Manuel Azkue organista oiartzuarraren omenezko hirugarren memoriala egingo da San Esteban parrokian, arratsaldeko 17:15ean hasita.

Mahai-inguruak zabalduko du ekitaldia. Ana Belen Garcia organista, Maddalen Dorronsoro Koru zuzendaria eta Antton Mendizabal 'Oiartzungo organozaleak' taldeko kidea izango dira hizlari. Besteak beste, Jose Manuel Azkue organista oiartzuarra izango dute hizpide. Gero, Oiartzungo parrokian dagoen organoaz mintzatuko dira eta azkenik, kontzertuaren xehetasunak azalduko dituzte.

Kontzertuari, berriz, arratsaldeko 18:00etan emango zaio hasiera. Oiartzungo Lartaun Abesbatzak (Maddalen Dorronsoro zuzendari dela) eta Ana Belen Garcia organojoleak hartuko dute parte emanaldian.

Antolatzaileek jakinarazi dutenez, pantaila handian ikusi ahal izango da kontzertua. Era berean, herritarrak animatu dituzte emanaldira joatera.

Azkue organista handia

Jose Manuel Azkue 1927an jaio zen Killikupe gaineko Aginagalde-Enea etxean, Oiartzungo plazan. Umetatik nabarmendu zen musikan. Hamaika urterekin Villafrancara (Nafarroa) joan zen fraidetzera eta han ere musikan nabarmendu zen. Hogei urterekin, apaiz egiteko unean, atzera egin eta etxera itzuli zen.

Soldadutza egin ondoren, kontserbatorio ikasketak egin zituen eta 1954an, AEBetara joan zen. Bidaia hark hilabete batzuetako esperien-tzia zirudien, baina hemezortzi urte egin zituen New Yorken, organista eta irakasle. 1975ean itzuli zen Euskal Herrira eta Donostiako Koruko Andre Maria elizako organista postua eskuratu zuen. Urtero, Donostiako Musika Hamabostaldian bereziki hitzordu horretarako ida-tzitako obra berriak estreinatzen zituen. Jaioterrira ere urtero etortzen zen xanisteban egunez, oso maitea zuen eta San Esteban parrokiako Cavaillé-Coll organoa.

Jose Manuel Azkue 2008ko abenduaren 13an zendu zen Hondarribian, 81 urte zituela.

Recibe nuestras newsletters en tu email

Apúntate