Diario Vasco

Txondorra prestatzen hasi dira Arditurrin

Josetxo Arbelaitz, Jose Billaluze eta Jose Manuel Etxarte.
Josetxo Arbelaitz, Jose Billaluze eta Jose Manuel Etxarte. / GOIZARIN
  • Hilaren 26an piztuko dute, jai giroan; abenduaren 16an, berriz, egur-ikatza ateratzeko txanda izango da

Bosgarren urtez, txondorra egiten hasi dira Arditurrin, Aiako Harria Natura Parkeko basoetan hain garrantzitsua izan den ikazkinen lana ezagutzera emateko helburuz. Oiartzungo Udala, Gipuzkoako Foru Aldundia eta Gipuzkoako Parketxe Sarea dira ekimen honen antolatzaileak.

Aurten ere, Jose Billaluze, Jose Manuel Etxarte, Joxe Luis Arbelaitz eta Josetxo Arbelaitz dabiltza txondorraren inguruko lanak egiten. Egurrezko egitura prestatuta, atzo aritu ziren lurraz estaltzen. «Eguraldi ona behar dugu estaltze lanak egiteko eta gaur [atzo] horretan aritu gara», adierazi dute txondorgileek. Prozesua ongi badoa, abenduaren 18an hasiko dira ikatza ateratzen.

Hilaren 26an piztuko da

Txondorra azaroaren 26an piztuko da, jai giroan piztu ere. Gertura- tzen direnek garai bateko ikazkinen lana nolakoa zen ikusi ahal izango dute. Egun berezi horretarako egitarau zabala prestatuko da. Bisita gidatuak ere izango dira txondorra piztu ondoren. Hilaren 26tik abenduaren 17ra bitartean, hura ikusteko bisitak egiteko aukera izango da, norbere kabuz edo gidatuta (aurrez erreserba eginda). Izan ere, abenduaren 17an egur ikatza ateratzeko txanda izango da. Egun horretan ere izango da musika eta festa Aiako Harriaren magalean.

Gaur egun lanbide hau galdu den arren, haren aztarnak aurki daitezke Aiako Harriko basoetan barrena. Basoek ikazkinen eta herritarren beharrak asebetetzen zituzten; txondorra eraikitzeko beharrezko egurra han biltzen zuten eta lan horrek aztarna ugari utzi ditu. Aiako Harriko basoetan antzinatik abeltzan-tza eta basogintza bateragarri egiten zituen zuhaitzak lepatzearen teknika erabili da, adarrak altuera jakin batean moztuta, egur ekoizpen handiagoa lortzen baitzen.

Gaur egun zuhaitzik lepatzen ez bada ere, zuhaizti lepatu ugari geratzen da inguruan. Gizakiaren eta naturaren arteko harremanaren emaitza diren kultur paisaia interesgarriak utzi dituzte.

Recibe nuestras newsletters en tu email

Apúntate