Diario Vasco

Bizikleta Martxa auzoz auzo, datorren igandean, Gurutzetik abiatuta

Oiartzungo Sarek antolatuta, datorren igandean, hilak 29, Bizikleta Martxa egingo da auzoz auzo, Gurutzetik hasita. Goizeko 11:00etan jarri dute hitzordua eta egun horretan pedalei eraginez, Oiartzungo auzoetara «10 presoren egoeraren larritasuna» plazaratu eta salatuko dute. «Haurrak, gurasoak, neskak, mutilak... guztiak animatu nahi ditugu, martxan parte hartzera», gonbidapena luzatu dute antolatzaileek.

Txirrindulariak

Pasa den ostegunean, herriko hainbat txirrindularik eta osasungintzako langilek zabaldu zuten Bizikleta martxara joateko deia. «Frantziar eta espainiar espetxeetan 10 euskal preso larriki gaixorik daude, eta horien eskubide urraketaren aurrean ezin dugu geldirik egon», nabarmendu zuten aurkezpenean. «Gaixorik dauden preso horiek osasun eskubideak urratuta dituzte, eta egoera larria bezain kezkagarria da», gaineratu zuten.

Beraz, aurkezpenean elkartutako herritarrek Sarek aurkeztu berri duen «Salatzen dut» dinamikaren baitan, egoera salatzen dutela adierazi zuten, euren konpromisoa erakusteaz gain Bizikleta martxaren deialdia eginez.

Azkenik, honako hau da bizikleta martxaren ibilbidea: Gurutze-Ergoien-Altzibar-Karrika-Altzibar-Iturriotz-Ugaldetxo-Arragua-Mendin-Oiartzungo plaza.

Recibe nuestras newsletters en tu email

Apúntate