Diario Vasco

Elizalde Herri Eskolan martxan dute aurtengo Guraso Eskola

Elizalde Herri Eskolak martxan jarri du aurtengo Guraso Eskola. Saioak ikasleen adinaren eta gaiaren arabera antolatu dituzte, «norberak bere interesen baitan parte har dezan». Hala ere, «saioak guraso guztiei irekiak izango dira eta nahi duenak zalantzak azaltzeko aukera izango du», nabarmendu du Andoitz Apaolazak, Eskolako zuzendariak.

«Gurasoek dituzten kezkei buruz giro goxoan hitz egiteko aukera izango dute, soluzio praktikoak eta sortzaileak eskuratu eta egunerokotasunari eta une konkretuetako zalantzei erraztasun handiagoz aurre egiteko», gaineratu du Apaolazak.

Guraso Eskola Arantxa Ezkerrak, psikologoa eta familia eta bikoteen psikoterapeutak, gidatuko du. Gainera, zaintza zerbi-tzua ere eskainiko da. Saioak Eskolako hirugarren solairuan dagoen Mediatekan izango dira, arratsaldeko 16:45ean hasita.

Egutegia adinaren arabera

Haur Hezkuntzako ikasleen gurasoentzat antolatu dira lehen bi saioak. Pasa den asteartean egin zuten lehen saioa eta bigarrena azaroaren 15ean izango da. 'Estuasunik gabeko eskolaratzea eta banatzea' da aztertuko duten gaia.

Azaroaren 22an eta 29an 6-7 urteko ikasleen gurasoen txanda izango da. 'Baloreak, arauak, mugak eta autonomia' izeneko gaiaz hausnartuko dute Eskerra adituarekin.

Urtarrilean izango du jarraipena Guraso Eskolak. Ilbeltzaren 17an eta 24an, 8-9 urteko ikasleen gurasoekin aztertuko duten gai interesgarria 'Komunikazioa eta haurrei eskaintzen diegun arretaren kalitatea eta denbora' izango da.

Azkenik, urtarrilaren 31n eta otsailaren 7an 'Haur eta gurasoen emozioak: adimen emozionala eta autoestimua' izango dute hausnarketarako gaia.

Recibe nuestras newsletters en tu email

Apúntate