Diario Vasco

Karla Lekuona zelaian jokatuko dute asteburuan herriko bi talde nagusiek

Hamaikako honek jokatu zuen Atletico de Madriden aurka.
Hamaikako honek jokatu zuen Atletico de Madriden aurka. / GOIZARIN

Asteburuan futbolaz gozatzeko parada izango dute oiartzuarrek, izan ere herriko bi talde nagusiek etxean jokatuko dute, Karla Lekuona zelaian hain zuzen. Bi taldeek aurreko asteburuan galdu egin zuten eta oraingoan zaleen animoek lagunduta hiru puntuak etxean geratzeko ahaleginean saiatuko dira.

Pasa den larunbatean jokatu zuen Gari Argoteren taldeak Cerro del Espinon bigarren koskan dagoen Atletico de Madrid taldearen aurka. Partida zaila izango zela aurreikusia zegoen eta halaxe suertatu zen. Nahiz eta hasieran oiartzuarrak etxekoen jokoa zapuzten ederki aritu baziren ere, lehen zatia amaitu aurretik madrildarrek aurreratzea lortu zuten eta bigarren zatian haien joko ona medio beste hiru sartzeko parada izan zuten. Hortaz, 4-0 galdu zuen Gari Argotek gidatzen duen taldeak, Madrilen.

Etziko neurketa ere ez da batere xamurra izango hamahirugarren koskan dagoen Oiartzun taldearentzat. Levante Femenino izango du aurkari, hirugarren koskan dagoen talde indartsua. Nolanahi ere, zaleen animo eta txaloekin lehen garaipena eskuratu dezakete Argoteren jokalariek. Goizeko 12:00etan hasiko da partida, Karla Lekuona zelaian.

Vasconia aurkari, bihar

Txema Fraileren jokalariek bihar jokatuko dute denboraldiko hamargarren jardunaldia. Vasconia izango dute aurrez aurre arratsaldeko 15:30ean hasiko den partidan, Karla Lekuonan. Zortzigarren koskan daude oiartzuarrak hamalau punturekin; donostiarrak, berriz, hamabosgarren koskan, bederatzirekin.

Pasa den igandean, OHO-ko taldeak galdu egin zuen Hernaniren aurka, Zubipe zelaian. Partida hasi orduko jaso zuten lehen zartakoa oiartzuarrek eta saiatu baziren ere hernaniarrek ez zieten inongo zirrikitorik utzi berdinketa erdiesteko. Bigarren zatian, gainera, aurkako penaltia seinalatu zuen epaileak eta hori gutxi balitz hirugarrena ere sartu zuten etxekoek, neurketaren amaieran.

Recibe nuestras newsletters en tu email

Apúntate