Diario Vasco

'Paperezko ametsak' egitasmoa jarri du martxan Abaraxka Ludotekak

  • Xabi Salaberria oiartzuarrarekin zuzeneko konexioa egin zuten saioan

Abaraxka Ludotekak «Paperezko ametsak» izeneko egitasmoa jarri du martxan eta pasa den larunbatean egin zen aurkezpen saioa udal areto nagusian. Hantxe bildu ziren neska-mutilen eta haien gurasoen aurrean proiektuaren egitasmoaren berri eman zuten. Besteak beste, liburu zaharrei bigarren bizitza eman nahi diete, irakurle berriak sortzeko. Azken batean, liburuei hegoak jarri nahi dizkiete Oiartzunen, munduan hegan egin dezaten.

Horregatik, gaztetxoek etxean soberan zituzten liburuak eraman zituzten aretora, han bilketa lana egiten hasteko. Izan ere, liburu horiei bigarren bizitza eskaini nahi diete, falta dituztenei eramanez.

Salaberriarekin konexioa

Haurrak nahi helduak dituzte helburu Abaraxkako kideek. Haiekin partekatu dute proiektua. Liburuak euskaraz, gaztelaniaz... bildu nahi dituzte, irakurtzearen plazerra zabaltzen laguntzeko, bide batez liburuei bizitza luzatuz. Larunbateko saioa Argentinan dagoen Xabier Salaberria oiartzuarrarekin zuzeneko konexioa egiteko ere baliatu zuten. Hark azaldu zuen zer den 'Paperezko ametsak' egitasmoa. Salaberriak zehaztu zuen jasotako liburuekin zer egingo duten. «Hiru norako ditu egitasmoak: Batetik, Argentinako iparraldean dagoen Humauaca herriko eskola ttiki bat eta Saharako kanpamenduetako eskolak gaztelaniazko liburuentzat; Hego Amerikako euskal etxeetara bidaliko dituzte euskarazko irakurgaiak, bestetik». Guraso eta haurren parte hartzea bikaina izan zen. Liburuez gain «dirua ere behar dugu paperezko amets hauei hegoak jarri eta munduan zehar zabaltzeko». Haur eta gaztetxoek proposatutako «hainbat ideiarekin ziur gaude lortuko dugula: errifak, eskulanak egin eta saldu, bizkotxoak saldu, logoarekin egindako txapak...». Hortaz, hemendik aurrera adi egon beharko da, herritarren laguntza ere beharko dutelako «paperezko ametsak egia bihurtzeko».

Recibe nuestras newsletters en tu email

Apúntate