Diario Vasco

Buru-gaixotasunen inguruko tailer irekia, gaur arratsaldean

  • Arraztalo eta Aldura elkarteak elkarlanean dira tailerraren antolatzaileak

Gaur, hilak 3, buru-gaixotasunen inguruko tailer irekia egingo da Manuel Lekuona bibliotekan, arratsaldeko 18:30ean. Arraztalo eta Aldura Elkarteak elkarlanean dira tailerraren antolatzaileak. Gero, Oarsoaldeko beste herrietan egingo dira antzeko tailerrak.

Tailerraren helburua herritarrek buru-osasunari eta gaixotasun psikikoei buruz duten ikuspuntua ezagutu eta biltzea izango da. «Orain arte hitzaldiak antolatu izan ditugu gai horren inguruan lanean dabiltzan adituekin. Ekintza horiek interesgarriak izan diren arren, beste pauso bat emateko garaia dela uste dugu bi elkarteek», adierazi dute elkarteen arduradunek. Horregatik, «gure inguruko herritarren iritziak entzun, gure ikuspuntua azaldu eta hausnarketa kolektiboa egiteko bereziki prestatutako tailerra antolatu dugu», nabarmendu dute.

Arraztalo Elkarteak sei urte daramatza herrian gaixotasun psikikoa duten horien egoera azaleratu nahian. Hitzaldiak antolatu izan dituzte, «baina oraingoan entzuteko garaia dela uste dugu». Gaurko tailer dinamikoan, ariketa ezberdinak eginez, bertaratzen direnek gaixotasun psikikoak bizitzako hainbat esparrutan sortzen dituen arazoak ikusi ahal izango dituzte. Horien inguruan parte-hartzaileek duten iritzia jaso nahi du Arraztalo Elkarteak.

Gonbidapena luzatu dute

Horregatik, gaixotasun psikikoarekin aurretik kontaktua izan duten eta izan ez duten herritarrak gonbidatu nahi dituzte tailerrera. Horrez gain, erakunde publikoetako ordezkari eta langileak, elkarteetako ordezkariak eta ikastetxeetako ordezkariak ere animatu nahi dituzte parte hartzera. Gizartean buru-osasunaren inguruko kezka handitzen ari den honetan, «horrelako ekintzetan herritarren parte-har-tzea garrantzitsua dela uste dugu».

Tailerrak bi orduko iraupena izango du eta Farapik koordinatuko du.

Recibe nuestras newsletters en tu email

Apúntate