Diario Vasco

'Lanin' egitasmoaren emaitzak aurkeztuko dira bihar

  • Saioa arratsaldeko 19:30ean hasiko da udal areto nagusian

Maiatzean, Jexux Leonet alkateak, Ioritz Aizpuru Euskara zinegotziak, Aitziber Arnaiz Euskara teknikariak, Mikel Irizar Gipuzkoako Foru Aldundiko Hizkuntza Berdintasunerako zuzendariak eta Mikel Urdangarin Ahizeko aholkulariak 'Lanin' egitasmoaren aurkezpena egin zuten, herriko enpresa ertain eta ttikiak (50 langile baino gutxiago dituztenak) euskalduntzeko helburu duen proiektua. Saio hartan, Oiartzungo 500 enpresatan euskararen erabileran aurrera egiteko beharrak aztertu eta Udalak eman dezakeen zerbitzua diseinatzeaz hitz egin zen, Udala, lan-mundua eta euskalgintzaren arteko elkarlanean, langune bat sortzeko. Aurkezpen hartan enpresa horietako 29 ordezkari elkartu ziren, enpresen euskalduntzearekiko interesaren seinale.

Bilera ireki eta espezifikoak

'Lanin' egitasmoa maiatzetik urria bitartean garatu da. Bitarte horretan, Oiartzungo lan munduaren inguruko informazioa jaso; lan esparruaren eta herriaren arteko lotura egin; lan-ildoa bideratzeko eta indartzeko proposamenak bideratu eta, lan-mundua eta euskara elkartzeko erreferentzialtasuna landu dira. Orain, egindako lanaren emaitzen aurkezpena egiteko tenorea iritsi da.

Hortaz, datorren ostegunean, hilak 27, emaitzen berri emango da eta, bide batez, datozen hiru urtetarako diseinatuko den estrategia azalduko da. Horretarako, Jexux Leonet alkatea; Ioritz Aizpuru Euskara zinegotzia; Mikel Urdangarin AHIZEko teknikaria eta Joxean Amundarian Gipuzkoako Foru Aldundiko Hizkuntza Berdintasunerako Zuzendaritzako zerbitzuburua izango dira hizlari. Saioa arratsaldeko 19:30ean hasiko da, udal areto nagusian.

Recibe nuestras newsletters en tu email

Apúntate