Diario Vasco

Buru-gaixotasunen inguruko tailer irekiak antolatu dira Oarsoaldean

Arraztalo eta Aldura Elkarteek elkarlanean, buru-gaixotasunen inguruko tailerrak antolatu dituzte, Oarsoaldean. Tailer horien helburua herritarrek buru-osasunari eta gaixotasun psikikoei buruz duten ikuspuntua ezagutu eta biltzea da. «Orain arte hitzaldiak antolatu izan ditugu gai horren inguruan lanean dabiltzan adituekin. Ekintza horiek interesgarriak izan diren arren, beste pauso bat emateko garaia dela uste dugu bi elkarteek», adierazi dute elkarteen arduradunek. Horregatik, «gure inguruko herritarren iritziak entzun, gure ikuspuntua azaldu eta hausnarketa kolektiboa egiteko bereziki prestatutako tailerrak antolatu ditugu», nabarmendu dute.

Gaixotasun psikikoa duten pertsonen esperientziak entzunez eta gizarteak buru-gaixotasunaren inguruan dituen ideia nagusiak laburbilduz, gaia era dinamikoan lantzeko asmoa dute. Gizartean buru-osasunaren inguruko kezka handitzen ari den honetan, «horrelako ekintzetan herritarren parte-hartzea garrantzitsua dela uste dugu».

Horregatik, gaixotasun psikikoarekin aurretik kontaktua izan duten eta izan ez duten herritarrak gonbidatu nahi dituzte tailerretara. Horrez gain, erakunde publikoetako ordezkari eta langileak, elkarteetako ordezkariak eta ikastetxeetako ordezkariak ere animatu nahi dituzte parte hartzera.

Lau herrietan

Tailer berbera Oarsoaldeako lau herrietan antolatu dute ahalik eta pertsona gehienek parte-hartzeko aukera izan dezaten. Honako data eta lekuetan izango dira: Oiartzunen, azaroaren 3an, 18:30ean, Liburutegiko aretoan; Errenterian, azaroaren 10ean, 18:30ean Merkatuzarren; Lezon, azaroaren 24ean, 18:30ean Kultur Aretoan. eta Trintxerpen, abenduaren 1ean, 18:30ean Alkateordetzan.

Tailerrak bi orduko iraupena izango du eta Farapik koordinatuko ditu. Antolaketan Gipuzkoako Foru Aldundiaren (Gizarte Politikako Saila) eta eskualdeko lau udalen laguntza izan dute.

Recibe nuestras newsletters en tu email

Apúntate