Diario Vasco

Merkataritza txikia suspertzeko prozesua martxan jarri du Udalak

Ezkerretik eskuinera, Iker Eizagirre eta Ainhoa Retegi (Hiritik Ateko teknikariak), Eneritz Arbelaitz (alkateordea) eta Jexux Leonet (alkatea).
Ezkerretik eskuinera, Iker Eizagirre eta Ainhoa Retegi (Hiritik Ateko teknikariak), Eneritz Arbelaitz (alkateordea) eta Jexux Leonet (alkatea). / GOIZARIN
  • Bihar, herriko merkataritza txikiaren egoera identifikatzeko mapeo kolektiboa egingo da

Merkataritza txikia suspertzeko helburuarekin, Ekin-tza Plana osatzeko prozesua martxan jarri du Oiartzungo Udalak, Hiritik At eta Aztikerren laguntza teknikoarekin. «Hiru hilabete iraungo du azterketak eta Oiartzungo tokiko merkataritzari hauspo emateko plana definitzea izango da helburua», argitu du Jexux Leonet alkateak. Egitasmoaren aurkezpenean Jexux Leonet alkateak eta Eneritz Arbelaitz alkateordeak, Ainhoa Retegi eta Iker Eizagirre Hiritik At-eko teknikariekin batera parte hartu zuten.

Alkatearen hitzetan, «prozesu honek, hasieratik bukaerara, merkatari eta herritar guztien ekarpenak izango ditu oinarri. Izan ere, merkataritza txikia ez da merkatarien kontua soilik. Oiartzuar guztiei eragiten dio honen eraginak, merkataritza txikia ezinbesteko baldintza baita herri bizia edukitzeko. Horrela, gure herrian negozioak dituzten merkatariei eta gainerako herritarrei prozesuan parte hartzeko gonbita luzatzen diegu».

Dagoeneko martxan dagoen lehenengo fasean, merkataritza txikiaren diagnostiko zehatza lortzea da helburua. Horretarako, herriko merkatari txiki guztiekin egongo da, herritar talde bati inkestak egingo zaizkio eta osatzeko, bihar, mapeo kolektiboa egingo da.

Mapeo kolektiboa

Mapeo kolektiboaren helburua merkatari, elkarte, eragile eta kon-tsumitzaileen artean Oiartzungo merkataritza txikiaren indarguneak, ahulguneak eta mehatxuak identifikatzea izango dela adierazi du Leonetek.

Modu «erraz eta dibertigarrian» planteatuko saioa izango da biharkoa. Taldeka, Oiartzungo mapa handi baten laguntzarekin aztertuko dira tokiko merkataritza eta herri bizitza suspertzeko bideak.

Esan bezala, biharko saioa arratsaldeko 16:00etan izango da, Doneztebe plazan.

Azaroan bigarren fasea

Bigarren fasean, «Ekintza Planaren lan-lerro nagusiak definitu eta epe ertainean aurrera eramateko antolaketa eztabaidatuko da. Hori, azaroaren 9an (asteartea) eta 23an (asteazkena) egingo diren foro irekietan erabakiko da. Bi saioak Manuel Lekuona bibliotekan izango dira, 20:00etan», azpimarratu du alkateak.

Agerraldian aipatu moduan, amaieran prozesutik ateratako ondorioak merkatari eta herritarrei itzuliko zaizkie, ekintza publiko baten bidez. Abenduaren 17an izango da saio hori, Txerri Egunaren bueltan.

Recibe nuestras newsletters en tu email

Apúntate