Diario Vasco

Euskal Ligako emakumeen taldeak hasiera bikaina eman dio denboraldiari

Hamaikako honek irabazi zion Hernaniri pasa den asteazkenean.
Hamaikako honek irabazi zion Hernaniri pasa den asteazkenean.

Bost partida jokatu eta bostak irabazi ditu Oiartzun Kirol Elkarteko Euskal Ligako taldeak. Hortaz, lider da Oiartzungo emakumeen taldea, hamabost puntu batuta. «Azken partida pasa den asteazkenean jokatu genuen Hernaniren aurka Zubipen eta 1-4 irabazi genuen, haien etxean», diote pozik jokalari gazteek. Amaia, June eta Ainhoa (2) izan ziren taldeko golegileak.

Irailaren 18an eman zioten hasiera aurtengo denboraldiari eta lehen partida erraz nagusitu ziren 3-1 irabazita Zarautz taldeari, Karla Lekuona zelaian. Bigarren partida jokatzera Bizkaia aldera joan ziren jokalari oiartzuarrak eta 0-3 nagusitu ziren han Leioako Emakumeen aurka. Urriaren 2an jokatu zuten hirugarren neurketa, Beasainen aurka eta 3-2 hartu zuten mendean Goierriko taldea, etxean. Laugarren jardunaldian Erandiora joan ziren eta Betiko Neskak taldearen aurka 1-3 irabazi zuten, Nagore, 'Lolo' eta Ainhoaren golei esker.

Seigarren neurketa etzi, hilak 15, jokatuko dute Oiartzungo gazteek Ugaldetxon Barakaldoren aurka, arratsaldeko 17:30ean hasita. Merezi du bertara joan eta haien jokoarekin gozatzea.

'Kirolez Blai!' martxan da

Jose Migel Lopez eta Mirari Martiarena esatariek dagoeneko martxan jarri dute «Kirolaz Blai!» irratsaioaren 8. denboraldia. Astelehenero, asteburuko kirol emaitzen errepasoa egiten dute, kronikak, iritziak, erreportajeak tartekatuz. "Goizeko 11:00etan hasten gara 'Arguyua' saioan, Oiartzun irratian", adierazi du Lopezek. "Errepikapenak, berriz, 13:15ean eta 20:30ean izaten dira", argitu du.

Bestalde, ostiralero kirol kartelera eta asteburuko kirol informazioa ematen dute, albistegietan.

Recibe nuestras newsletters en tu email

Apúntate