Diario Vasco

Zuberoako ikasleak Haurtzaro ikastolan

Urkabe ingurura egun pasa joan ziren ikasleak primerako eguraldiarekin.
Urkabe ingurura egun pasa joan ziren ikasleak primerako eguraldiarekin. / GOIZARIN

Aste honetan, Zuberoako Aloze ikastolako 16 ikasle eta 2 irakasle Haurtzaro ikastolan izan dira eta hiru eguneko egonaldia egin dute bertan. Ekimen hau Elkarrekilan Euskal Herria egitasmoan kokatu behar da. Izan ere, Haurtzaro Ikastolak hitzarmena egin zuen Zuberoako Basabüruako Aloze eta Sohütako ikastolekin. «Hitzarmen horren helburua da hiru ikastoletako ikasle, irakasle eta gurasoen artean harremanak indartzea», azpimarratu du Sorkunde Lekuonak, Haurtzaro ikastolako zuzendariak. «Honela, Zuberoako eta Oarsoaldeko eremu euskalduna osatzen dugun pertsonen arteko harremanak indartu nahi dira».

Asteartean iritsi zen ikasle-irakasle taldea Oiartzun aldera. «Goizean, Donostia bisitatu zuten eta arratsaldean hartu zuten gurean ostatu», zehaztu du Lekuonak. «Asteazkenean, berriz, LH 4. mailako gure ikasleekin batera egun pasa egin zuten, giro ederrean. Urkabe ingurua ezagutu ondoren, gaztainak biltzen ibili ziren gero». Abaraxka ludotekan ere jostatu zuten. Arratsalde amaieran afari-merienda zuten ikastolako frontoian eta hantxe jaso zuten zuberotarren opari ederra. Asteazkenean eman zioten amaiera Oiartzun aldera eginiko bisitari.

«Oso egitasmo aberatsa da. Asko betetzen du. Bai ikasleak baita irakasleak ere oso gustura ikusi ditut», dio Lekuonak.

Hurrengo elkartrukeak

Elkartruke hauek izango dute jarraipena Haurtzaro ikastolan. «Martxoan DBH 3. mailako ikasleak Bretainiara joango dira, Gwiseni herrira. Hantxe astebete emango dute, frantsesa praktikatzen. Maiatzean, berriz, LH 4. mailako taldea Maulera joango da, aste honetan jasotako bisita itzultzera. Azkenik, ekainean DBH 1. mailako ikasleak Lapurdiko Larzabale kolegioko ikasleekin egingo dute elkartrukea.

Recibe nuestras newsletters en tu email

Apúntate