Diario Vasco
Jokalari oiartzuarra partida batean baloiarekin.
Jokalari oiartzuarra partida batean baloiarekin. / GOIZARIN

Oiartzun taldeak U. D. Tacuenseren aurka jokatuko du bihar, Tenerifen

  • Pasa den igandean Sporting-en aurka 1-1 berdinduta, Silviak sartutako golak arrakasta gaitza izan du sare sozialetan

Oiartzun taldea Kanariar irletara abiatu da gaur goizean, bihar goizeko 11:00etan (12:00etan, hemen) Tacuenseren aurka jokatu behar duelako denboraldiko laugarren jardunaldia, Pablos Abril zelaian. Neurketa zaila izango bada ere, Gari Argoteren jokalariak oso indartsu daude pasa den igandean urrats garrantzitsua eman zutelako Huelvako Sporting-ekin berdinduta, Karla Lekuona zelaian.

«Irabaztera irtengo dira eta azken minuturaino neurketan nagusitzeko borrokatuko dute», adierazi du Eider Herrero taldeko koordinatzaileak. Izan ere, garaipena eskuratuz gero, Gari Argotek gidatzen duen taldeak lehen aldiz irabaziko luke etxetik kanpo 1. mailan.

Sailkapenean koska bat igota, oiartzuarrak orain 10. tokian daude, 2 punturekin. Lehen mailara igo berri den kanariar taldea, berriz, 15. koskan dago, puntu bakarrarekin.

Huelvako Sporting-en aurka

Pasa den igandean jokatu zuen Oiartzun taldeak 3. jardunaldiko partida Huelvako Sporting-en aurka, Karla Lekuonan. Indar handiko neurketan, oiartzuarrak aurreratu ziren 13. minutuan Silvia Ruizek sartutako tanto ikusgarria medio. Merezitako txalo zaparradarekin eskertu zuten zaleek bai taldearen jokaldia baita aurrelariaren aziertoa ere.

Bigarren zatian, ordea, andaluziarrak estutzen hasi ziren eta 61. minutuan etxekoen aurkako penaltia seinalatu zuen epaileak eta Anita Hernandezek ez zuen huts egin. Gero, oiartzuarrek bizpahiru aukera eder izan zituzten berriro aurrea hartzeko baina ezin asmatu. Amaieran, gainera, bigarrena seinalatu zuen Oiartzunen aurka, zaleen haserrerako. Eskerrak bigarrenean Hernandezek zerura bidali zuela baloia. Hortaz, azkenean puntu banaketa Karla Lekuonan.

Honako hamaikakoa zelairatu zuen Argotek: Ane Otxoa, Ane Pérez, Amaia Vázquez, Marina Agoües, Alazne Bengoetxea (Ainara Manterola, 78. m.), Joana Arranz, Carol González, Anne Mugarza, Irantzu (Jone Bilbo, 71. m.), Eguzkiñe Peña (Sara Olaizola, 71. m.) eta Silvia Ruiz (Nerea Abancens, 82. m.).

Recibe nuestras newsletters en tu email

Apúntate