Diario Vasco

Primerako giroan bukatu dira Ugaldetxoko festak

Gazteen afarian 84 lagun elkartu dira.
Gazteen afarian 84 lagun elkartu dira.
  • Maritxu Odriozola eta Pako Eskudero auzokideak omendu dituzte aurten

Pasa den asteburuan hasitako festei atzoko egunarekin, San Migel eguna, eman zioten amaiera Ugaldetxon aurtengo jaiei, auzoetako festen denboraldiari agur esanez. Eguraldia lagun, auzotarrek ederki gozatu zuten propio prestatutako ekitaldietan.

Atzo, goizeko 10:30ean ospatu zuten meza Atamitxen eta 70 lagun elkartu ziren. Gero, hamaiketako garaian tertulian aritzeko tartea ere izan zuten auzotarrek. Orduantxe omendu zituzten auzokide helduenak, Maritxu Odriozola eta Pako Eskudero. Arratsaldean, berriz, auzoko toka txapelketako garaian ere bazen giro karparen inguruan. Eta festek merezi duten amaiera emateko, afari-merienda egin zuten Atamitxen.

Jai biribilak izan dira aurtengoak ere parte hartzeari eta giroari dagokionez, eta «eguraldi bikaina lagun izan dugu ia egun guztietan», adierazi du Itziar Iñarra Ugaldetxo Kultur Taldeko kideak. «Igande arratsaldean eguraldi petrala egin bazuen ere, egitarauan jarritako ekitaldi guztiak egin ditugu, zorionez».

Ekitaldi jendetsuak

Festak iraun duten lau egunetan hogeitabi ekitaldi izan dira Ugaldetxo auzoan. «Oso gustura gaude aurtengo San Migelekin. Auzotar ugari animatu dira festetan parte hartzera eta denon artean ederki ibili gara», argitu du Iñarrak. Halaxe da, ostiralean XXXVIII. truk txapelketan 70 bikotek parte hartu zuten eta lehen saria Koldo Markos eta Pierre Elizalde bikoteak irabazi zuen. «Aurten marka guztiak hautsi ditugu truk txapelketan. Inoiz baino partaide gehiago eta gazte asko», dio alaitsu. «Argitu gaua, argitu etorkizuna», Gure Esku Dagok antolatutako ekimenak ere izan zuen arrakasta, Iñarraren iritziz.

Larunbatean, eguraldia lagun, arrakastatsuak izan ziren arratsaldeko duatloia eta haurren tailerrak. Era berean, oso jendetsuak izan ziren bai auzoko gazteen afaria (84 lagun, karpan) baita beste afaria ere (75 lagun, Atamitxen). Gaueko kontzertuek ere ez zuten huts egin eta 'Autobus Magikoa' taldeak, esate baterako, urte beteko ibilbideari errepasoa emateko baliatu zuen saioa.

Igande goizeko ekintzak primeran joan ziren, arratsaldean, berriz, eguraldia okertu bazen ere, goitibeheren jaitsiera egin zen. «Bederatzi partaide ibili ziren Txipitoko maldan, inoiz baino partaide gehiago», azpimarratu du Iñarrak. «Baina ikusle gutxiago animatu ziren saioa ikustera».

Recibe nuestras newsletters en tu email

Apúntate