Diario Vasco

Kirola, Musika eta Dantza gaur, sanmielak ospatzeko

Duatloia hasteko prest kirolari gazteak.
Duatloia hasteko prest kirolari gazteak. / ARGAZKIAK GOIZARIN

Primerako giroa zegoen atzo Ugaldetxo auzoan. Sanmielak ospatzen ari dira eta ez zen jenderik falta antolaturiko ekitaldiez gozatzeko. Goizean goiz, auzoko haur eta gaztetxoak elkartu eta primeran mozorrotu ziren batukadarekin batera auzoan zehar paseatzeko. Arratsaldean, berriz, duatloi probak hartu zuen festaren lekukoa eta makina bat kirolari ikusi genituen euren trebeziak erakusten, bai korrika baita bizikletan ere. 4-8 urte bitartekoen artean, Ane Mugika eta Alain Garzia izan ziren bizkorrenak; 9-12 urte bitartekoen artean, aldiz, Garazi Etxaniz eta Oier Zabaleta. Aski gustura jaso zuten euren saria. Gainontzeko parte hartzaileentzat ere izan ziren opariak, baita goxoki festa ere.

Bien bitartean, puzgarriek eta ludotekak ere izan zuten nahiko estimazio. Makillaje tailerra, behinik behin, gaztetxoz gainezka zegoen. Eta amaierako txokolate eta bizkotxoekin.

Gaur, ekitaldi ugari

Festen azken txanpan sartuko dira Ugaldetxon, gaur. Goiz erestiarekin hasiko dute eguna, goizeko 09:00etan. Izan ere, Lartaun txistulariek beste behin ere esnatuko dituzte auzotarrak.

Gero, goizeko 10:30ean IV. Krosa izango da auzoan zehar modalitate ezberdinetan: bakarka, bakarka 16 urtetik beheiti, bikoteka erreleboka, eta bikote mistoa. Ordu berean pilota partidak jokatuko dira Txipitoko frontoian. Guztira lau partida jokatuko dituzte.

Eguerdiko 12:00etan, berriz, Haurtzaro Dantza Taldearen ikuskizunaz gozatzeko aukera izango da.

Arratsaldeko 17:00etan hainbesteko arrakasta duen Goitibehera jaitsiera Txipitoko maldan, 14 urtetik gorakoentzat. Gero, 18:00etan, Karpan «Bat Batean» taldearen emanaldia, euskal pop/rock entzuteko parada hain zuzen.

Eta egunari amaiera egokia emateko: sardina -jatea, ogitartekoak... Eta 19:30ean, Suzko Goitibehera.