Diario Vasco

Matrikula epea zabalik, Intxixu AEK euskaltegian

Dagoeneko zabalik dago Oiartzungo Intxixu AEK euskaltegian matrikulatzeko epea. Hortaz, eguneroko bizimodua euskalduntzeko asmoa dutenek euskara irakasteko % 100 modu afektiboa aurkituko dute bertan. Era berean, modu efektiboa ere aurkituko dute herritarrek euskaltegian, laneko egoera eta curriculuma hobetzeko maila egiaztatu nahi dutenek, hain zuzen.

Esan beharra dago ikasleek egin beharreko esfortzua handia dela nagusiki denbora eta diruari dagokionez. Diruaren zama arintzearren Oiartzungo Udalak beka sistema paregabea dauka. Beka sistema horren bidez, Oiartzunen erroldatua dagoen eta asistentzia ona duen ikasleari matrikularen %50a aurreratuko dio Udalak eta bestelako baldintzarik beteko balu, hau da, langabetua, gurasoa, ikaslea... izatea %20 gehiago itzuliko dio ikasturte bukaeran.

«Urriaren hasieran hasiko ditugu eskolak, oraindik garaiz zabiltza», argitu du Saioa Ballesteros arduradunak. Hortaz, «badakizu bertara etorri edota deitu eta esaguzu zein mailatan eta zein ordutegitan aritu nahi duzun, informazio horrekin taldeak osatzen joan gaitezke eta», zehaztu du.

Esan bezala, matrikulazio epea irekita dago Fermiñene etxeko 2. solairuan edo 607534263 eta 943 493957 telefonoetan.