Diario Vasco

Kategoriko III. bertso-bazkaria, Elizalde Herri Eskolan

  • Herriko giro eta adin desberdineko jendea biltzea oso positibotzat jo dute antolatzaileek

Gustura daude Elizalde Herri Eskolako bertsozaleak. «Gaur zortzi, eskolan bertan ospatu genuen bertso-bazkaria zoragarria izan zen, beste behin ere», aitortu du Aingeru Palomo irakasle eta antolatzaileak. Aurten, ohiko bertsolariez gain, Amets Arzallus ere batu zitzaion hirukoteari. Maialen Lujanbio, Andoni Egaña, Ander Lizarralde eta A mets Arzallus aritu ziren Leire Beloki gai jartzailearen gidaritzapean.

Irati Matelok, Elizaldeko DBHko bertso eskolako kideak, Habaneraren doinuan abestutako bertsoarekin eman zien ongietorria bildutako guztiei. Eskolan bertan prestatutako otordu goxo-goxoa dastatu bezain pronto, hasi ziren bertsolariak lanean. Aurten, antolatzaileek musika tartekatu nahi izan zuten. Beñat Kortajarenak eta Gorka Irastorza 'Lezoti'-k saxofoiarekin eta gitarrarekin, 'No woman no cryren' doinupean hasi zuten saioa. Ederki uztartu zituzten musika eta bertsoak protagonistek.

Martiarena puntu jartzaile

Bertsolariek launaka, binaka eta banaka egin behar izan zuten kantuan. Exteban Martiarenak jarritako puntuak edota Irati Matelok, Aiora Irazuk eta Jonek jarritako koplak erantzun behar izan zituzten Ametsek eta Anderrek. Azken honi, trikitixaren laguntzaz jarri zizkioten koplak bertso eskolako kideek. Bestalde, bertsolariek elkarri galdetuta hitz ezkutua asmatzeak edota segidilak irrika handia piztu zuen aurtengoan ere. Amets eta Andoni aritu ziren segidilan jende artean. Bi bertsolariak bidaia agentziakoak zirenez, entzuleak oporretara nora bidaliko lituzketen esan behar zieten. Zipoka aritzeko aukera paregabea, noski. Entzuleren batekin Brasilera joango omen litzateke gustura Andoni, baina, gehienak, Euskal Herrian kokatu zituzten: Zelatunen, Hernion edota Zuberoa aiekan, maskaraden aitzakian.

Saioarekin arrunt gustura

Saioak bi ordu eta erdi iraun zuen eta arrunt gustura egon zen jendea. Bertsolariek ere «saio borobila» izan zela aitatu zuten. «Antolatzaileok eskerrik beroenak eman nahi dizkiegu lanean aritu ziren guraso, irakasle, ikasle, musikari eta, modu batera edo bestera, lagundu zuten guzti-guztiei. Oiartzungo Udalari ere eskerrak eman nahi dizkiogu egindako ekarpenagatik», nabarmendu du Palomok.

Elizaldek herriari irekitako ekimena izaki, herriko giro eta adin desberdineko jendea biltzea oso positibotzat jo dute antolatzaileek, «hau ez baita bertso-bazkari soil-soila». Anderrek agurreko bertsoan bota zuen gisara, «herria egiten jarraitzeko aitzakia da. Herria eraiki, giro atsegin eta goxoan».