Diario Vasco
Karmele Mitxelena Etxebeste gazte oiartzuarra.
Karmele Mitxelena Etxebeste gazte oiartzuarra. / GOIZARIN

Karmele Mitxelena Etxebeste: «Etengabe idatziko nuke, nahi beste denbora izango banu»

  • Bertso paper idazlea

  • Oiartzuarrak irabazi berri du 25. Lazkao Txiki Bertsopaper Lehiaketa, 'Bigarren eskuko bihotzak' lanari esker

Karmele Mitxelenak irabazi berri du 25. Lazkao Txiki Bertsopaper Lehiaketa, 'Bigarren eskuko bihotzak' lanari esker. Argi Berri Elkarteak antolatzen du lehiaketa, Ordiziako Udalaren laguntzarekin eta aurten ere Manu Olanok, Nikolas Zeberiok eta Izar Sarriegik osatu dute epaimahaikoa. Sari hau ez da Mitxelenak lortzen duen lehena. Izan ere, makina bat txapelketa irabazi ditu oiartzuarrak. Hori guztiaz gehiago jakiteko bildu gara Mitxelenarekin eta elkarrizketa hau harilkatu dugu.

-Azken saria jaso berri duzu, 25. Lazkao Txiki Bertsopaper Lehiaketa hain zuzen. Zein izan da jorratu duzun gaia?

-Bakardadeari idatzitako bertso batzuk dira sarituak. Bakardadea norberak aukeratua ez denean zaila da eramaten, eta zenbaitetan pertsonak eraldatzera iristen da. Nire bertsoetako protagonista bakardade behartu horretan murgilduta dagoen norbait da, beti ihes egin nahi eta ezinean.

-Idaztea gustuko duzu, ttiki-ttikitatik.

-Bai, beti gustatu izan zaidan zerbait da, etengabe idatziko nuke nahi beste denbora izango banu.

-Bertsolaria zaitugu. Noiz hasi zinen hitzekin jolasean?

-Hamaika urterekin hasi nintzen bertso eskolan. Aitari esker gure etxean bertsolaritza aski ezaguna zen, eta berari esker eman nuen pausoa.

-Bertso paperak, ipuinak... Non sentitzen zara erosoen?

-Berdin zait zer den sortu behar dudana, paper zuriaren aurrean beti sentitzen naiz oso gustura. Egia da prozesuak desberdinak direla baterako edo besterako, baina ez nuke jakingo zein aukeratu. Bertsolaritzak zailtasun gehiago jartzen dizkie ideiei: errimatu beharra, neurrian sartzea... eta asko gozatzen dut horien kontra borrokan azkenean nahi dudana nahi dudan bezala esatea lortzeko. Argi dudana da nire lekua paperaren aurrean dagoela, eta ez jendaurrean.

-2012. urtea oparoa izan zen zuretzat. Izan ere, hainbat sari jaso zenuen: II. Mariasun Landa saria, Oreretan; Iparragirre saria, 'Eskutik' lanarekin; XVIII. Kimetz saria... Zein lan idatzi zenituen sari horiek eskuratzeko?

-Mariasun Landa 'Dena duna' lanarekin irabazi nuen, eta Sorkun artistaren inguruan idatzi nahi izan nuen. Iparragirre saria, berriz, oso berezia izan zen niretzat, helduen mailan lehiaketa baterako idatzi nuen lehen ipuina izan zen, eta saritua suertatu zen. Izugarrizko poza hartu nuen. Azkenik, Kimetz lehiaketan berriz aspaldiko bi lagunen istorioa kontatzen nuen 'Hatz nagia' izenburua zuen lanarekin. Zenbait urteren ondoren patuak berriz elkartutako bi adiskide.

-'Errenteria hiria' ipuin lehiaketa ere inoiz irabazi duzu.

-Bitan irabazi dut, 2011 eta 2012an hain zuzen.

-2015ean, Julene Azpeitia 27. ipuin lehiaketan bigarren saria lortu zenuen 'Aitaren zapatak' ipuinarekin. Zer duzu esateko?

-2012an 1. saria lortu nuen, eta 2015ean bigarrena. Lehiaketa garrantzitsua da, sari handiak daude, eta ezin ukatu horrelako zerbait irabazteak bultzadatxo bat ematen dizula.

-Nolanahi ere, Karmele, badituzu sari gehiago.

-18 urtetatik aurrera (helduen mailan) irabazitakoak dira ondorengoak: Ordiziako Lazkao Txiki bertso paper lehiaketa (2006an 1. saria, 2009an 1. saria, 2010ean 1. saria, 2012an 2. saria, 2015ean 1. saria, 2016an 1. saria). Mungiako San Antontxu bertso paper lehiaketa (2006an 3. saria, 2011n 1. saria). Oreretako Zapirain anaiak bertso paper lehiaketa (2007an 1. saria, 2008an akzesita, 2009an akzesita, 2011n 2. saria). Oreretako Errenteria Hiria ipuin lehiaketa (25 urtetik beherako onenaren saria 2011n eta 2012an). Zumarraga-Urretxuko Iparragirre narratiba saria (2012an). Ordiziako Kimetz literatura lehiaketako saria (2012an). Durangoko Julene Azpeitia bertso paper lehiaketako 1. saria (2012an eta 2015ean). Zumaiako Julene Azpeitia Ipuin lehiaketa (2012an 1. saria eta 2015ean 2. saria). Lasarteko Mikrokontakizun lehiaketako irabazle (2013an). Gordexola Harana ipuin lehiaketako irabazle (2016an).

-Irakaskuntzara bideratu dituzu ikasketak. Zertan zabiltza orain?

-Donostiako ikastetxe batean egiten dut lan urtebeteko eta bi urteko haurrekin, eta horretaz gain, hizkuntza errefortzuko irakasle ere banaiz Lehen Hezkuntzan. Ez diot ikasteari utzi. Lehen Hezkuntzan diplomaduna naiz, Haur Hezkuntzako goi-mailako teknikaria, eta laster bukatuko dut Haur Hezkuntzako gradua (Gradu amaierako lana soilik falta zait). Psikomotrizitateko masterra ere egiten ari naiz. Argi daukat zer gustatzen zaidan.