Diario Vasco

Etxebizitza bulegoa martxan jarri du Udalak

Jexux Leonet, Agurtzane Lekuona, Fernando Nebreda eta Saioa Etxebeste etxebizitza bulegoan.
Jexux Leonet, Agurtzane Lekuona, Fernando Nebreda eta Saioa Etxebeste etxebizitza bulegoan. / GOIZARIN
  • Etxebizitza hutsak alokairu duinera bideratzeko egitasmoa sustatuko da bertatik

Etxebizitza Bulegoa zabaldu berri du Udalak. Irekiera saioan parte hartu zuten Jexux Leonet alkateak, Agurtzane Lekuona Gazteriako zinegotziak, Fernando Nebreda Oarsoaldea Garapen Agentziako kudeatzaileak eta Saioa Etxebeste teknikariak.

Alkateak adierazi zuenez, Etxebizitza Plan Integralaren baitan urratsetako bat da Etxebizitza Bulegoa. «Zerbitzu integrala emango du, herritarrentzako erosoa izan dadin: informatu, gestio lana, laguntzak bideratu...», zehaztu zuen Jexux Leonetek.

Etxebizitza Bulegoa martxan jartzeko, Oarsoaldea Garapen Agentziarekin hitzarmena sinatu du Udalak, bere bulego eta teknikarien bidez eskaini ahal izateko zerbitzua.

Etxebizitza Bulegoak aurretiko zitarekin funtzionatuko du. Horregatik, lehenengo deitu egin beharko da horretarako prestatutako telefonora (astelehenetik ostiralera, 09:00-14:00, 943 49 41 29).

Alokairu duina Oiartzunen

Etxebizitza Bulegotik sustatuko du Udalak etxe hutsak alokairu duinera bideratzeko egitasmoa. Oiartzunen etxebizitzaren inguruan dagoen arazoari aurre egiteko alternatiba gisa, Alokabideren ASAP eta Bizigune programak herrian sustatzea erabaki du Udalak. «Dagoeneko existitzen diren programak ezagutu eta haien egokitasuna aztertuta, haiek baliatzea erabaki da (batik bat ASAP programak piztu du Udalaren interesa)», nabarmendu zuen Agurtzane Lekuonak. Horretarako, Udalak eta Eusko Jaurlaritzak hitzarmena sinatu dute.

«Etxe hutsen jabe direnek eta maizter izan nahi dutenek, biek jasoko dute aholkularitza Etxebizitza Bulegoan: programetan parte hartzeko baldintzak eta abantailak azalduko zaizkie bertan», argitu du.

Bestalde, Udalak bere aldetik ere laguntza programa bat martxan jarri du, zaharkituta dauden etxebizi-tza hutsak konpondu eta alokairura bideratzen dituzten etxejabeei begira.

Programak funtzionatzeko lehen urratsa, alokairura ateratzeko etxebizitzak egotea da. Horregatik, jabeak euren etxebizitzak alokairu duinera bideratzera animatu nahi ditu Udalak. Ustez, denei egingo die mesede: etxe hutsen egoera hobetu, auzoak biziberritu, etxebizitza beharrean dauden herritarrei irtenbidea eskaini, eta etxejabeak ere onura ekonomikoa jasoko du.