Indartsu hasi dute ikasturtea Elizalden

LH 6ko ikasleak historiaurreko gizakien elikagaiak probatzen.

Raoul Servert geomorfologoaren bisita izan dute

BASTEROBERRI OIARTZUN.

Ikasturtea hasi bezain laster, Elizalde Herri Eskolako Lehen hezkuntzako 6. mailako ikasleek, historiaurreari buruzko ikastaro oso berezia izan dute. Eskolako aita izateaz gain, Raoul Servert geomorfologoa da. Valentziako Unibertsitate Politeknikoko irakaslea ere bada eta Parisko Historia Naturaleko Museoan ere lan egin izan du. Bertako materiala eskuragai izan dute gure ikasleek astebetez: harriekin egindako erremintak, musika tresnak, pinturak, nekazaritzarako lanabesak, eta abar luze bat. Ikasleek hau denak ikusi, ukitu, entzun eta lan ezberdinak egin dituzte. Ezin ditugu aipatu gabe utzi, eskalan eginiko busto eta hezurrak, aipaturiko Parisko museoko kopia zehatzak Elizalde Eskolan eduki ditugu gure ikasleen esku.

Eginiko ibilbidea oso luzea da: gizakien aurretik zeuden orrorinena, australopiteko ezberdinak, prantropoak, homo habilisa, neandertalak edo homo sapiens-sapiensak, gaur egungo gizakia ahaztu gabe. Ibilbide horretan, lehen esan bezala, ukitu, ikusi eta entzun ere egin dute, baina ikasleei zirrara gehien sortu diena, jatea izan da. Gure aitzindariek bizi irauteko jaten zutena eskolan bertan dastatzeko aukera izan baitute, eta nola ez, gure eboluzioan elikadurak izan duen garrantzia aztertu dute.

Bukatzeko, lerro hauetatik, Raoul Serverti beste behin eskerrak eman nahi dizkiete Elizaldeko irakasle eta zuzendariak: «gurekin beste urtebetez lan egiteagatik, mila esker».

Fotos

Vídeos