Sinadura biometrikoa ezarri du Osakidetzak

Posizioak, abiadurak, presio-azelerazioak eta lapitzaren makurdurak nahastezin bilakatzen omen dute sinadura biometrikoa./
Posizioak, abiadurak, presio-azelerazioak eta lapitzaren makurdurak nahastezin bilakatzen omen dute sinadura biometrikoa.

Horren bidez 11.901 baimen informatu sinatu dituzte pazienteek

Ahotsa, eskuetako zainak, irisa, hatz-markak... Pertsonal eta besterenezinak dira norberaren ezaugarri biometrikoak eta, horrenbestez, aspalditxo erabiltzen dira norbanakoen identifikaziorako, eremu pribatuan zein publikoan. Lanbidek, esaterako, iragarri berri du erabiltzaile guztiak datu biometrikoen bidez identifikatzea dela bere asmoa, eta hurrengo hilabeteetan hasiko dela sistema hori ezartzen.

Osakidetzan, berriz, urtarrilean jarri zen abian 'sinadura biometrikoa' delakoa. Kasu honetan ez da erabiltzen hatz-markarik, ezta irisa edo ahotsa azterteko gailurik ere, gailu digitalean eskuz egindako sinadura baizik. Banketxe eta aurrezki kutxa gehienetan darabiltenaren antzekoa, alegia. Osakidetzak ohar baten bidez azaldu duenez, "sistemak sinadura modu seguruan jasotzen du, ebidentzia biometrikoak bilduta (posizioa, abiadura, presio-azelerazioa eta lapitzaren makurdura). Hala, sinadura sinatutako dokumentuari baino ez dago lotuta".

Osakidetzako osasun-elkarte guztietan ezarritako sistemak "eraginkortasun eta segurtasun handiagoa ematen die pazienteen sinadura behar duten osasun-dokumentuei, baimen informatuari, esaterako".

Guztira, Osakidetzaren 11.901 baimen informatu sinatu dira sinadura biometrikoaren bitartez, historia kliniko digitalaren baitan. María Jesús Múgica Osakidetzako zuzendari nagusiak adierazi moduan, sinadura biometrikoaren sistemak segurtasun eta eraginkortasun handiagoa ematen dio baimen informatuaren tratamenduari, pazientearen sinadura behar baitu; sinatzailearen nortasuna eta dokumentuaren baliozkotasuna ziurtatzen ditu, baita horren pribatutasuna ere.

Orain arte, dokumentu horien izapideak egiterakoan, dokumentuak inprimatu, sinatu eta ondoren digitalizatu edo fisikoki biltegiratzea eskatzen zuen, eta horrek administrazio-baliabideetan arazoak sortzen ditu; dokumentua galdu edo kaltetzeko arriskua, kontrolatzeko zailtasunak, fitxategi fisikoak, etab.

Orain, Osakidetzan, "arrisku horiek desagertu egingo dira kudeaketa osoa txertatzean, eta alderdi horiek nabarmen hobetuko dira baimen informatuan; egingo zaion prozeduraren inguruko informazioa bildu eta ziurtatzen zaio pazienteari, baita horren baimena jaso ere. Baimen informatuak osasun-profesionalaren sinadura elektronikoa eta pazientearen biometrikoa biltzen ditu, eta ezinbesteko baldintza izango da behar bezala beteta eta informatuta egotea aipatu prozedura egin ahal izateko".

Temas

Euskera

Contenido Patrocinado

Fotos

Vídeos