Sagardozaleak epaile, abiatzear den Txapelketa Herrikoian

Sagardogileen topa iazko Sagardo Egunean.
Sagardogileen topa iazko Sagardo Egunean. / LUSA

Gipuzkoako Sagardogileen Elkarteak prestatu duen 'Iraila bete sagardo' egitarauaren barruan egingo da, beste hainbat ekitaldirekin batera

Irailean, sagardo berria egiten hasiko dira sagardogileak 2017ko uztako sagarrekin. Sagardoa, hala ere "urte osoan edaten den edaria" da, eta "urte osoko ofizioa" sagardogintza, Gipuzkoako Sagardogileen Elkarteak 'Iraila bete sagardo' egitarauaren berri emateko prestatu duen oharrean irakur daitekeenez.

Urte osokoak dira, jakina, edaria eta ofizioa, baina irailean jotzen dute gaina bi horien inguruko jarduerek, Donostia eta Ordiziako Sagardo Egunen eta Euskal Herriko Sagardo Txapelketa Herrikoiaren eskutik.

Aurreneko hitzordua larunbat honetan , irailak 2, egingo den Donostiako XXXII. Sagardo Eguna da. Goizeko 11:00etatik 14:00etara, sagardo dastatzea egingo da Konstituzio Enparantzan. Gipuzkoako Sagardogileen Elkarteko sagardoak dastatu ahal izango dira bertan, eta txertaketak egiten ikasteko tailerrak edota sagar mota ezberdinen erakusketa eta dastatzea ere egingo dira.

Plazan bertan egingo da halaber 'Sagardogintza, gure ofizioa' erakustaldia. Bertan sagarrak bildu, jo eta tolare zaharrarekin lehen muztioa atera eta dastatzeko aukera izango da. 12:30ean, berriz, sagardogileen topa eta omenaldia egingo da. Aurten Joxe Miguel Bereziartua izango da omendua, "sagardogintzari zein Elkarteari eskainitako guztia" eskertu nahi baitiote. Sagardo bereziek eta euskal sagardoa jatorri deiturak ere izango dute tarte berezia, kata egingo baita 13:00etan Liburutegi zaharraren azpian dagoen Kriptan. Kriantzak, apardunak, edota muztioak dastatu ahal izango dira. Txartelak plazan egongo den informazio puntuan (basoen salmentaren ondoan) erosi ahal izango dira. 5 euroren truke, 4 sagardo desberdin dastatuko dira. Goizean zehar, beraz, sagardogintzaren bide osoaz gozatu ahal izango da: sagar barietateetatik, txertaketetara, lehen muztioaren elaborazioa eta sagardoaren dastatzea

Ordiziako Sagardo Eguna, berriz, Euskal Jaien barruan egingo da irailaren 9an, larunbatarekin. Bertan burutuko da Euskal Herriko Sagardo Txapelketa Herrikoieko finalaurrekoa.

41 sagardotegi lehian

Txapelketa indartsu dator aurtengoan: 41 sagardotegik hartuko dute parte, eta lau finalaurreko eta finala jokatuko dira, bost herri desberdinetan. Gipuzkoako Sagardogileen Ellkarteak lehengo ohitura bati helduz ekin zion txapelketa herrikoia antolatzeari orain bi urte, eta 32 sagardotegirekin abiatu zen. Historikoki horrelako txapelketak egin izan dira, 1967tik aurrera zenbait txapelketa herrikoi antolatu baitzituen orduko sagardogileen elkarteak, herri desberdinekin elkarlanean, eta sare hori berreskuratzea da asmoa. 2015eko txapelketa lehen harria izan zen, iaz jarri zen bigarrena; eta finalaz gain, 3 finalaurreko antolatu ziren herriz herri. "Herriz herri egiten diren eta sare horretan sartzeko interesa duten txapelketa eta Sagardo Egunekin elkarlanean antolatu nahi du txapelketa herrikoia Gipuzkoako Sagardogileen Elkarteak", diote.

Esan bezala, hirugarren edizio honetan Euskal Herriko Sagardo Txapelketa Herrikoiak 4 finalaurreko eta finala izango ditu. Izena ematen duten Euskal Herriko Sagardotegietako sagardoak afaltzera inguratzen diren guztien artean dastatu eta puntuatuko dira. Epaile izan nahi duten herritarrek afari txartelak hartu beharko dituzte aldez aurretik (finalaurrekoak 26€ eta finala 32€), afalduaz egingo baita puntuaketa lana. Epaile, hortaz, edonor izan ahalko da.

Finalaurrekoak Ordizian, Andoainen, Zarautzen eta Oiartzunen izango dira, irailaren 8an, 15ean, 22an eta 23an, hurrenez hurren. Finala Azpeitian jokatuko da irailaren 30ean.

Afari kide-epaileek ez dute jakingo zein sagardotegitako sagardoa ari diren dastatzen eta bukaeran jakingo dira irabazleak zeintzuk diren, bai finalaurrekoetan eta baita finalean ere. Guztira Euskal Herriko 41 sagardotegik hartuko dute parte lehiaketa honetan. Epaile izateko, berriz, nahikoa da afaltzera eseri eta mahaira ateratzen duten sagardoari norberaren gustuen arabera 5-10 tarteko puntuazioa ematea.

Afari txartelak salgai daude Gipuzkoako Sagardogileen Elkartean batetik (943 33 68 11) edo gipuzkoakosagardoa@gmail.com helbidera idatzita; eta herriz herriko hainbat lekutan bestetik.

Temas

Euskera

Fotos

Vídeos