La Leze eta Aizpea gaztandegietako gaztak, sarituak Londresen

La Lezeko Eli Gorrotxategi, gaztak prentsan sartzeko momentuan./JESÚS ANDRADE
La Lezeko Eli Gorrotxategi, gaztak prentsan sartzeko momentuan. / JESÚS ANDRADE

La Lezeko gazta ketuak sari gorena lortu du, hiru izarrekoa, 150 elikagai onenen artean sailkatuz

Artzai Gazta Elkarteko La Leze eta Aizpea gaztandegiak sarituak izan dira Londresen egin den Great Taste Awards 2017 Nazioarteko Lehiaketa gastronomiko entzutetsuan.

Gaztandegi bakoitzak bi gazta aurkeztu ditu lehiaketara, eta La Lezeko gazta ketuak sari gorena lortu du, hiru izarrekoa, 150 elikagai onenen artean sailkatuz. Bi izarreko eta izar bateko aipamenak ere lortu dituzte beste gaztek.

Guztira, 12.000 elikagai baino gehiagok hartu dute parte lehiaketan.Horrela eman dute aditzera Eli Gorrotxategik eta Eli Arrillagak, hurrenez hurren La Leze eta Aizpea gaztandegietako ordezkariak, eta Luisa Villegas Artzai Gazta Elkarteko koordinatzaileak, astearte goiz honetan emandako prentsaurrekoan.

Haiekin batera, Asparrena zein Olaberriako udaletako ordezkariak, Idiazabal Jatorri Deiturakoak eta Gipuzkoako zein Arabako Aldundietakoak izan dira. Victoria Urresti epailea ere bertan izan da, Great Taste Awardseko dastatzaile ofiziala eta Idiazabal Jatorri Deiturako Dastatze Batzordeko ordezkaria.

Izendapenak abuztuan eman dira jakitera, martxoa eta uztaila bitartean 60 dastatze saio baino gehiago egin ondoren. Munduko bazter guztietako elikagaiak aurkeztu dira lehiaketara, nahiz eta gehienak europar jatorrikoak izan. Guztira, 12.366 elikagai gourmet dastatu behar izan dituzte epaimahaiko kideek. Bertan, maila handiko adituak aritu dira elikagaiak dastatu eta puntuatzen.

Hiru kategoria

Elikagai sarituak hiru kategoriatan banatu dituzte: hiru izarrekoa (paregabea), bi izarrekoa (bikaina) eta izar bakarrekoa (aparta). Arabako Leze gaztandegiak guztira lau izar lortu ditu; hiru, elorri zuriko egurrarekin ketutako gaztarekin, eta beste bat, azal naturalarekin egindakoarekin.

Eli Gorrotxategi gaztandegiko arduraduna harro agertu da Londresen lortutako izar kopuruarekin. La Lezeko gaztek berezko nortasuna dutela nabarmendu du: "Gure ardi latxek mendiko eta larreko bazka uztartzen dute egunero, eta nahasketa horrek nolabaiteko ñabardura ematen dio ekoizten dugun esneari. Esne gordin honekin, gure artaldeetatik aukeratzen ditugun gatzagi naturalekin eta familia osoak jartzen dugun mimoarekin egiten dugu horren emaitza onak lortu dituen gazta. Ez dago beste sekreturik".

Ez dira lehenengo izarrak La Lezerentzat; izan ere, iaz beste lau izar lortu zituzten, bina aurkeztutako bi gaztekin. Olaberriako Aizpea gaztandegiak, berriz, beste hiru izar lortu ditu. Bi, Urbianekoitzitako Natural Idiazabal Euskal Herriko Mendiko gaztarekin; eta beste bat, gazta ketuarekin.

Artzai Gazta Elkartetik azpimarratu dute Great Taste Awards 2017 lehiaketara aurkeztu dituzten gazta guztiak "sarituak" izan direla. Aditzera eman dutenez, The Guild of Fine elkartearekin, lehiaketa antolatzen duen elkartearekin, duten harremanari esker 2015az geroztik Artzai Gazta Elkartea ordezkatuko duen lau gazta aurkezteko abagunea dutela.

Era berean, gogorarazi dute urte guzti hauetan lehiaketara aurkeztu diren "zazpi gaztandegik" lortu dituztela sariak lehiaketa entzutetsuan, guztiak Nafarroako, Arabako, Gipuzkoako eta Bizkaiko lurralde lehiaketetako irabazleak.

Zalantzarik gabe, aipamen hauek Artzai Gaztako artzainek egiten duten produktuaren kalitatearen adierazgarri dira, "gure artaldeek ematen duten esnearekin egiten den produktuaren kalitateari gorazarre egiten diotenak".

Temas

Euskera

Fotos

Vídeos