Hondartzei buruzko informazio puntuak Ondarretan amaituko du bidaia

Irailaren 4ra arte egongo da zabalik informazio puntua Ondarretan.
Irailaren 4ra arte egongo da zabalik informazio puntua Ondarretan.

Udan zehar, Gipuzkoako hondartzen erabilera arduratsua eta zaintza sustatzeko sentsibilizazio-kanpaina egin du Foru Aldundiak

Uda honetan, sentsibilizazio-kanpaina jarri du abian Gipuzkoako Foru Aldundiak hondartzen erabilera arduratsua eta gune horien zaintza sustatzeko. Kanpainaren izena 'Zain ditzagun gure hondartzak' da, eta baliabide nagusia, berriz, Aldundiak Emausen laguntzaz antolatutako Informazio-puntu ibiltaria.

Informazio gune ibiltari hori dagoeneko Hondarribia, Zumaia, Orio, Zarautz, Getaria, Deba, Mutriku eta Donostiako Zurriola hondartzetan zehar ibili da. Astearte honetan, abuztuak 22, Ondarretako hondartzan jarri dute, eta Foru Aldundian ohar baten bidez iragarri duenez hortxe jarraituko du irailaren 4ra arte. Puntu-ibiltaria egunero dago zabalik 11:00tik 19:30ak bitartean.

Kanpainaren helburua da, esan bezala, hondartzen ardurazko erabilera iraunkorraren garrantziaren inguruan sentsibilizatzea, aisialdiari, turismoari eta kirolari dagokionez. Informazio puntuan, hortaz, Gipuzkoako hondartzei buruzko informazio orokorra aurkitzeaz gain, ardurazko erabilerarako gomendioak eta Emaús Gizarte Fundazioak SINdesperdicio markaren bitartez abiarazitako TOLDOSS proiektuari buruzko informazioa ere jaso daiteke.

TOLDOSS proiektua Emaús Gizarte Fundazioak abiarazi du, HARIA eta GALARRE sortzaile berriekin batera. Proiektu honek hondakina berreskuratu (toldo zaharren tela, kasu honetan) eta gauza berriak fabrikatzeko baliabide bihurtzen du: poltsak, kapazuak, motxilak, nezeserrak, amantalak, alpargatak eta abar fabrika daitezke. Proiektuak, gainera, enplegu solidarioa sortzeko aukera ematen du. Oharrak dioenez, "ekonomia zirkularrerantz aurrera egitea ingurumenean, hazkuntza ekonomikoan eta enplegu berde eta sozialean aurrera egitea delako".

Temas

Euskera

Fotos

Vídeos