Festa biribila Oñatin

Jende-ilara luzea ibilbidearen erdian, Murgialdaiko mahastiaren ondoan./FELIX MORQUECHOREN ARGAZKIAK
Jende-ilara luzea ibilbidearen erdian, Murgialdaiko mahastiaren ondoan. / FELIX MORQUECHOREN ARGAZKIAK

Milaka lagun azaldu ziren atzo Kilometroen jaira, trafiko aldetik arazorik gabe. «Bagenekien azkeneko egunak estresanteak izango zirela, eta astebete aurreratu genuen jaia», esan zuen umoretsu lehendakariak

FELIX IBARGUTXIOÑATI.

Kilometroak oso jendetsua izan zen atzokoa. Badira urte dezente antolatzaileek bisitari-zenbakirik aipatzen ez dutena, baina milaka lagun azaldu ziren Oñatira, Aloña azpiko zirkuitu ederrean metro batzuk egitera. Txantxiku Ikastolako antolatzaileek esan zutenez, «biribila» izan zen jaia, eta «aurrreikuspen guztiak gainditu dira».

Oñatik erronka zaila zuen trafikoari dagokionez. Legazpi eta Oñati batzen dituen Udanako mendatea ixtea erabaki zuten antolatzaileek, eta, halaxe, sarrera bakarra gelditzen zen, Bergara eta Arrasate aldeko San Prudentzioko biribilgunekoa. Baina azkenean aparteko ibilgailu-pilaketarik gabe joan zen eguna. Kotxeak urrutiko aparkalekuetan laga behar zituzten bisitariek, eta gero autobusetan sartu Oñatiraino ailegatzeko.

Arazo bakara Legazpin gertatu zen. Goizean, autobus zerbitzuak ez zuen behar bezala funtzionatu, eta behar baino denbora gehiago zain egon behar izan zuten batzuek. Jaiaren antolatzaileek barkamena eskatu zuten atzoko balantze-oharrean.

Debagoienako jendeak ondo erantzun zion bizikletaz azaltzeko gonbitari

Kilometroak kultur elkarteko Artolak: «Egungo hezkuntza legedia zulo bat da»

Nabarmentzekoa da, bestalde, bezperan Oñatira azaldutako autokarabana kopurua: 180tik gora izan ziren, aurreikuspen guztiak gaindituz.

Oñatiarrek Kilometroak 2017ra bizikletaz joateko egindako deiari ere «sekulako erantzuna» eman zion Debagoieneko jendeak. Unibertsitatean egokitutako bizikletendako aparkalekuan 750 bizikleta sartu ziren goizean. Eguraldi bikaina lagun, oinez etortzeko aukera egin zutenak ere, asko eta asko izan ziren.

Eguerdian lekukoaren txandaketa egin zen. Ohiko eszena errepikatu zen: Txantxiku ikastolako presidente Aitor Guridik Nekane Artolari eman zion zurezko lekukoa -Kilometroak kultur elkarteko presidenteari- eta honek Urretxu eta Zumarragako ikastolako presidente Argiñe Artolazabali.

Beraz, KMK 2018 Urretxu-Zumarragan izango da. Artolazabalek esan zuenez, ziur daude arrakasta izango dutela. «Oñatiko lana erreferentzia eta eredu izango da guretzat», esan zuen Artolazabalek.

Irekitasuna aldarri

Goizeko 9.30ean hasi zen atzoko festa. Agurreko dantza batekin eman zitzaion hasiera. Andoni Egaña bertsolaria eta Nere Gil -bertako ikasle ohia- jardun ziren aurkezpenak egiten. Oñatiko Kilometroen ezaugarri batzuk aletu zituen Egañak, eta auzolanaren ideia azpimarratu. «Ikastola honen eta jai honen beste ezaugarri bat irekitasuna da. Ez da gure herrira, gure hizkuntzara mugatzen», esan zuen.

Arduradun eta agintarietan, Aitor Guridi ikastolako presidenteak hartu zuen hitza aurrena. Umoretsu jardun zuen: «Bagenekien azkeneko egunak estresanteak izango zirela, eta astebete aurreratu genuen jaia». Izan ere, ohitura izan da Kilometroak urrian lehen igandean egitekoa, baina Oñatin sanmigelak oso festa sentituak direnez, aurreko asteburura eraman zuten ikastolaren jaia.

Antolaketa lanetan egon den «auzolana» goraipatu zuen ikastolako presidenteak: «zer hitz polita, zer hitz aberatsa!». Eta, jarraian, parte hartu duten boluntarioen jarrera gogorarazi zuen: «Hamasei lantalde jardun dira lanean, baina gero daude gurasoak, bikoteak... gu etxetik kanpo, eta eskerrak horiei ere!»

Cristina Uriarte Eusko Jaurlaritzako Hezkuntza sailburua ere mintzatu zen. Adierazi zuenez, «Euskadirako hezkuntza sistema berriaz» gogoeta egiten ari dela bere departamendua, eta horretarako batzuekin eta besteekin biltzen. «Sistema eguneratu baten beharrean gaude eta eragile guztiok behar zaituztegu. Kalkulu politikoek ez dute tokirik hemen», gaineratu zuen.

Gero, ikastolako ikasleek dantza egin zuten festaren ereserkiaren erritmoan, oso erritmo bizia. Kilometroak kultur elkarteko lehendakari Nekane Artolak jardun zuen hurrena. Berak gidatzen duen elkartea festa honen gaineko hausnarketa egiten ari da, eta emaitzak datorren urtean jakinaraziko ditu.

Nekane Artolak esan zuenez, «egungo legedia zulo bat da. Hezkuntza sistema propioa eraiki behar dugu». Aldarrikapena egin zuen Artolak: «Gaur egun gure hezkuntza sistemak dituen gabezia, ahuldade eta bestelakoen iturburua da egungo legedia», adierazi zuen, eta hain zuzen ere gaur bertan Eusko Jaurlaritzan hezkuntza eragileek eta Hezkuntza Sailak izango duten bilera «lege horretara eramango gaituen lehenbiziko geltokia izan dadin» eskatu zuen.

Foru Aldundiko diputatu nagusi Markel Olano ere oholtzan zen. «Orain dela 40 urte, Beasainen lehenengo Kilometroak egin zenean, ni mutiko kozkorra nintzen. Orduan ere eraldatzailea zen ikastola. Orain, Debagoienean konfiantzaren pedagogian oinarritutako hezkuntza eredu batekin hasi dira», esan zuen.

Boluntarioen lana goraipatu zuen Olanok: «Boluntarioek errekonozimendua merezi dute. Ezinbestekoa da funtzionario espiritua alde batera uzten duten bolondres horien lana».

Alkateak, Mikel Biainek, esan zuen herriaz «harro» daudela oñatiarrak.

Modu bitxi batez bukatu zen goizeko saioa. Inguruko balkoi batzuetatik gizon eta emakume batzuen irrintziak entzun ziren. 'Lekaixo' esan ohi diote Oñatin irrintziari, eta 'Lekaixoka' da Kilometroen leloa. Garai batean, auzolanera deitzeko, lekaixoka jardun ohi ziren oñatiarrak, eta hortik leloa. Izan ere, auzolanean oinarritutako festa egin nahi izan dute Txantxiku ikastolakoek.

Herritar xeheei omenaldi

Horrelakoetan, beti egiten zaie omenaldi pertsona edo talde batzuei, eta aurtengoan 50 lagun izan ziren omenduak, herritar xeheak, zenbait hamarkadatan zehar ikastolari lagundutakoak. Hain zuzen ere, eskola-orduz kanpoko tailerretan -era askotako tailerretan- lagundutakoek jaso zuen gorazarre-plaka.

Santa Ana aretoan izan zen omenaldi-ekitaldia. Iñigo Ugartek eta Kepa Zubiak Ruper Ordorikaren 'Egin kontu' abestia kantatu zuten gitarra hartuta, eta gero bertan ziren guztiek bertso jarri batzuk kantatu zituzten, Leteren 'Habanera' doinua hartuta.

Bestalde, Erronka izeneko lehiaketa jokatu zen goiz eta arratsalde. Hogei ikastolatako taldeak aritu ziren; hamalau eta hamasei urte bitarteko neska-mutil taldeak.

Irabazlea Oiartzungo Haurtzaro Ikastolako ikasle taldea izan zen. Bigarren tokian Andoaingo Aita Larramendi Ikastolako taldea gelditu zen, eta hirugarrengoan Arrasate-Aretxabaletako Arizmendikoa.

Izan du berritasunik aurten Erronkak. Izan ere, lehia bigarren maila batean utzi eta auzolanari eman zitzaion lehentasuna neurri batean. Hala, parte hartu zuten ikastola guztiak iritsi ziren finalera. Helburua zen parte-hartzaile guztiek egitea proba guztiak.

Más

Temas

Euskera

Contenido Patrocinado

Fotos

Vídeos